«Ռազմավարական նախաձեռնությունների կենտրոն»-ի վտանգները

Հայաստանն անկախության օրվանից մինչ օրս չի ունեցել երկրի ռազմական արդյունաբերության զարգացմանը միտված պետական ծրագիր և այս ոլորտի նկատմամբ չի եղել համակարգված պետական մոտեցում:

Կառավարությունը լրացրել է այդ բացը և ընդունել «Ռազմավարական նախաձեռնությունների կենտրոն» հիմնադրամ ստեղծելու մասին որոշում: Հիմնադրամի ստեղծման շարժառիթներից մեկն ապրիլյան քառօրյա պատերազմից հետո արված վերլուծություններն ու եզրահանգումներն են: Այս հիմնադրամի գործունեության արդյունքում Հայաստանում զարկ է տրվելու ռազմական տեխնիկայի արտադրությանը, քանի որ հիմնադրամի գործունեության համար գերակա ուղղություններ են ճանաչվել ՀՀ ԶՈՒ-ի սպառազինությունում գոյություն ունեցող տեխնիկայի նորոգումը, արդիականացումը, նորերի  արտադրումը, ինչպես նաև  հրաձգային նոր զենքերի, զինամթերքի, թեթև սպառազինության, հրետանային միջոցների արտադրումը: Հաշվի առնելով արցախյան հակամարտության կարգավորման ձգձգումն ու  Իսրայել-Ադրբեջան ռազմական լայնածավալ համագործակցությունը, նման հիմնադրամի ստեղծումը Հայաստանի համար օրվա պահանջ էր, և հանրության մեջ ունեցավ դրական արձագանք: Մտահոգիչն այստեղ հիմնադրամին հատկացվող գումարների տնօրինման հարցն է:

Ըստ նախագծի՝  պետական և ոչ պետական կառույցների կողմից ստեղծվելու են հիմնադրամներ՝ ՀՀ ռազմարդյունաբերության զարգացման ծրագրերի ֆինանսավորման նպատակով, իսկ «Ռազմավարական նախաձեռնությունների կենտրոն» հիմնադրամին հատկացվող գումարների տնօրինողն ու ծախսերի վերահսկող մարմինը լինելու է Պաշտպանության նախարարությունը: Ռազմական պատվեր կատարող ընկերությունները գնահաշվարկները համաձայնեցնելու են հենց այս նախարարության հետ:  

Այս հանգամանքը,  հաշվի առնելով բանակում գնումների և մատակարարումների մասին վերջին աղմկահարույց բացահայտումները և հանրությանը հայտնի կոռուպցիոն դեպքերը, հասարակության շրջանում առաջ են քաշում նոր կասկածներ և հարցադրումներ: 

Աղավնի Սուքիասյան