«2016 թվականը եզդիների համար նաև ձեռբերումների տարի էր»

2016 թվականը եզդիների համար ոչ միայն կորուստների, այլև ձեռբերումների տարի էր: Դեկտեմբերի 24-ին հրավիրված մամուլի ասուլիսի ընթացքում «Երիտասարդ եզդիներ» ՀԿ նախագահ Սաիդ Ավդալյանը ներկայացրեց եզդի ազգի ձեռքբերումներն ու նվաճումները: Ըստ այդմ՝ 2015 թվականի նոյեմբերի 13-ին Շանգալ քաղաքի ազատագրումից հետո երկրորդ ամենամեծ նվաճումը 2016-ի նոյեմբերի 7-ին եզդիական Բաշիկ և Բահզան բնակավայրերի ազատագրումն էր՝ ԻՊ-ի զինյալների ձեռքից: 

«Չնայած եզդիական Բաշիկն ու Բահզանը ամբողջությամբ ավերված են, սրբավայրերը՝ պայթեցված, այնուամենայնիվ, այս բնակավայրերի ազատագրումը մեծ ուրախություն արթնացրեց եզդի ժողովրդի շրջանում և հույս՝ Շանգալի շրջանի ամբողջական ազատագրման համար: Այսօր մեր եզդի մարտիկները մասնակցում են ոչ միայն Մոսուլի և Թել Աֆարի ազատագրմանը, այլ նաև ռազմավարություն են մշակում Շանգալի բոլոր բնակավայրերի ազատագրման համար»,- նշեց Ավդալյանը: 

Վերջինիս խոսքով՝ 2016 թվականի ապրիլի 1-ին իր գործունեությունը սկսեց համաեզդիական արբանյակային հեռուստաընկերությունը՝ «LALISH TV»-ն, որը հիմնադրվեց Ռուսաստանում եզդի ազգի մեծ բարերար Միրզա Սլոյանի ջանքերով: Հեռուստաընկերությունը մասնաճյուղեր ունի Գերմանիայում, Ֆրանսիայում, Իրաքում, այդ թվում՝ Հայաստանում: «Այս հեռուստաընկերությունն առաջին հերթին աշխարհի եզդիներին հնարավորություն է տալիս միմյանց մասին տեղեկացված լինելու և եզդիների խնդիրները բարձրաձայնելու: Ամանորից հետո հեռուստատեսության հայաստանյան մասնաճյուղը կսկսի իր գործունեությունը»,- մանրամասնեց բանախոսը: 

Ձեռքբերում կարելի է համարել նաև այն, որ Ռուսաստանում ստեղծվեց եզդիներին միավորող առաջին համաեզդիական կազմակերպությունը՝ «Եզդիական կոնգրեսը», որը, Ավդալյանի խոսքով, իր առջև նպատակ է դրել բարձրաձայնել առաջին հերթին Ռուսաստանի եզդիների խնդիրները, երկրորդ հերթին՝ զբաղվել եզդիների ավելի գլոբալ հարցերով, ինչպես օրինակ, ցեղասպանության ճանաչման, եզդի փախստականներին, եզդիական զինված ուժերին աջակցություն ցուցաբերելու հարցը: 

Հոկտեմբերին Վրաստանում կայացած խորհրդարանական ընտրություններում հաղթող ճանաչվեց «Վրացական երազանք» կուսակցությունը, որի համամասնական ցուցակում ընդգրկված էր եզդի ազգի ներկայացուցիչը: «Ուրախ եմ, որ Վրաստանի խորհրդարանում եզդի ազգն ունի ներկայացուցիչ՝ ի դեմս Իսկո Դասընիի, ով, համոզված եմ՝ կպաշտպանի եզդիների իրավունքները և կնպաստի խնդիրների լուծմանը: Շատ կցանկանամ, որպեսզի այլ երկրների խորհրդարաններում ևս ներկայացված լինեն եզդիները: Ի դեպ՝ հույս ունեմ, որ առաջիկա խորհրդարանական ընտրություններից հետո ՀՀ խորհրդարանում ևս մենք կունենանք մեր ներկայացուցիչն, ով կպաշտպանի եզդի ազգի շահերը և կբարձրաձայնի հրատապ խնդիրները»,- ասաց նա: 

Անցնող տարվա մայիսի 25-ին Երևանի քաղաքապետարանի որոշմամբ Ավան վարչական շրջանի Շահինյան փողոցի 4-րդ նրբանցքը անվանակոչվել է եզդիների ազգային հերոս Ջահանգիր աղայի անունով: Ապրիլի 21-ին Երևանում և օգոստոսի 3-ին Արմավիրի մարզի Ակնալճի եզդիական սրբատեղիում բացվեցին Շանգալի եզդիների ցեղասպանության նվիրված հուշակոթողներ: 

Չնայած այս ամենին, Ավդալյանը, ցավով նշեց, որ Հայաստանի եզդիական համայնքն այս տարվա ընթացքում մեծ ձեռքբերումներ՝ որպես այդպիսին, չի ունեցել, սակայն այլ երկրներում ապրող եզդիական համայնքների ձեռբերումներն ու նվաճումներն անմիջական դրական ազդեցություն ունենում են Հայաստանի եզդիական համայնքի ներկայացուցիչների վրա. «Մենք չենք տարբերակում, թե այդ ձեռքբերումները որ երկրի եզդիական համայնքի նվաճումներն են: Մենք դա ընդունում ենք որպես ողջ եզդի ազգի նվաճումներ»: