Տղամարդիկ նաև գենդերային անհավասարության զոհ են. փորձագետ

«Հայաստանում գենդերային անհավասարության մասին խոսելիս, սովորաբար, շեշտադրումն արվում է կանանց հիմնախնդիրների, բռնության ենթարկված կանանց իրավունքների վրա, բայց իրավունքների անհավասարության խնդրին բախվում են նաև տղամարդիկ: Քանի որ հայ հասարակությունը հայրիշխանական կարծրատիպերով է առաջնորդվում, դրա հետևանքով տղամարդիկ հայտնվում են բավականին բարդ իրավիճակում»,-ԼՈւՐԵՐ.com-ի հետ զրույցում նման տեսակետ հայտնեց Աշխատանքի և սոցիալական հետազոտությունների ազգային ինստիտուտի շարունակական կրթության և վերապատրաստման բաժնի պետ Նարինե Դավթյանը: Անդրադառնալով՝ տղամարդիկ և գենդերային անհավասարությունը խնդրին, վերջինս նշեց, որ տարիներ շարունակ հայաստանյան իրականության մեջ արմատացած է շարունակում մնալ այն կարծրատիպը, որ հենց տղամարդիկ են, ովքեր բացառապես պետք է կրեն ընտանիք պահելու և ընտանիքն ամեն ինչով ապահովելու պարտավորությունը, իսկ, եթե տղամարդը դա չի կարողանում անել, շատ հաճախ ոտնահարվում են նրա իրավունքներն, ինչը հանգեցնում է լրջագույն խնդիրների: «Կյանքի առավել կարճ տևողություն, սիրտ-անոթային հիվանդությունների աճ և այլն. Սրանք հետևանք են մեր մեջ արմատացած բազմաթիվ կարծրատիպերի, որի հետևանքով տղամարդկանց իրավունքները խախտվում են, և դրա օրինակները շատ-շատ են»: Ըստ տիկին Դավթյանի՝ այս պահին մենք չունենք նման հետազոտություն, որպեսզի կարողանանք թվերով խոսել, բայց, որ երևույթն առկա է, դա փաստ է:

Մեր զրուցակցի պնդմամբ՝ տղամարդու դերի բարձրացման և իրավունքների պաշտպանության համար պետության կողմից պետք է իրականացվի հայեցակարգային մոտեցում. «Եթե, օրինակ՝ վերցնենք տղամարդիկ և կրթության ոլորտը, ապա կտեսնենք բազմաթիվ բացեր: Տղամարդու դերը տղա երեխայի դաստիարակության հարցում շատ կարևոր է, մինչդեռ դպրոցներում տղամարդ ուսուցիչները բավական փոքր թիվ են կազմում, բուհական համակարգում խնդիրը նույնն է, թերևս, մի տարբերությամբ՝ տղամարդկանց մենք կարող ենք տեսնել ամբիոնների վարիչների պաշտոններում, ինչն ունի իր բացատրությունն. այդ պաշտոնի համար նախատեսված աշխատավարձն ավելի բարձր է:

«Տղամարդկանց նախադպրոցական և հանրակրթական համակարգ ներառելը խթանելու համար պետությունը կարող է օրինակ մանկավարժական մասնագիտություններ նախընտրող տղաների համար սահմանել արտոնություններ, կամ՝ չորս տարի դպրոցում աշխատանքը կարող է համարվել ծառայություն բանակում: Սրանք տարբերակներ են, բայց լուրջ ուսումնասիրություններ պետք է կատարել, որպեսզի տղամարդու իրավունքների պաշտպանությունը, մտածողության փոփոխությունը, տղամարդուն մեկ ոլորտից մեկ այլ ոլորտ ընդգրկելը չտա բացասական արդյունք»,-իր խոսքը եզրափակեց Նարինե Դավթյանը՝ նշելով, որ գլոբալ առումով՝ խնդիրը վերաբերվում է մարդու իրավունքների ոտնահարմանը:

Աղավնի Սուքիասյան