ՀԱԿ-ի կողմից ոչ մի փաստ չհնչեցվեց. Հերմինե Նաղդալյան (Տեսանյութ)

ՀՀԿ-ական պատգամավոր Հերմինե Նաղդալյանը Լուրեր.com-ի հետ զրույցում անդադառնալով ՀԱԿ-ի կողմից ՍԴ ներկայացրած դիմումի քննությանը` նշեց, որ ՀԱԿ-ի կողմից որևէ փաստեր ընդհանրապես չներկայացվեցին: 

«Ինչպես տեսանք, փաստեր մենք ընդհանրապես չլսեցինք: Այդ մասին խոսեցին և՛ ՍԴ-ի դատավորները, և՛ ԿԸՀ-ի ներկայացուցիչերը, և՛ դահլիճում նստած բոլորս: Արձանագրեցինք, որ վերլուծություններ, ենթադրություններ, եզրահանգումներ էին, բայց փաստեր, փաստարկներ չկային։ Չկային, դրա համար չէինք լսում, եթե լինեին, վստահաբար կլսեինք», - նշեց ՀՀԿ-ական պատգամավորը:

Վերջինս առանձնացրեց նաև այն, որ Զոլաքար գյուղի պատմությունը քանի օր «մատի փաթաթանի պես տանում-բերում են»: 

«Մարդն ինքը հարյուր անգամ կրկնել է, որ որևէ բան չի եղել, իր հանդեպ որևէ մեկը բռնություն չի գործադրել, և մինչև այսօր մեզ դեռ համոզում են, որ այդ մարդուն վախեցրել են և այլն: Այսօր հնչող մերկապարանոցը վերլուծություններ և ենթադրություններ էին, որոնք ի վերջո պարզելու ենք բոլորս, որ սխալ ենթադրություններ են», - նշեց Հերմինե Նաղդալյանը:

Հիշեցնենք, որ այսօր ՀՀ ՍԴ-ն սկսել է բանավոր ընթացակարգով և դռնբաց նիստում քննարկել Հայ ազգային կոնգրեսի դիմումը մայիսի 6-ին տեղի ունեցած համամասնական ընտրակարգով Աժ ընտրությունների արդյունքներն անվավեր ճանաչելու վերաբերյալ:

Գործի վերաբերյալ հաջորդ նիստը տեղի կունենա ս.թ. մայիսի 29-ին: