Ոստիկանապետը երիտասարդ իրավապահներին կոչ արեց միշտ հիշել, որ իրենց առաքելությունն անմնացորդ ծառայությունն է հասարակությանը

Մայիսի 24-ին ՀՀ ոստիկանության պետ, գեներալ-լեյտենանտ Վլադիմիր Գասպարյանն աշխատանքային հանդիպում ունեցավ պարեկապահակային ծառայության նորաստեղծ ստորաբաժանման անձնակազմի հետ: Անդրադառնալով ստորաբաժանման գործունեությանը՝ Վլադիմիր Գասպարյանն ընդգծեց, որ գլխավոր խնդիրը ոչ միայն ոստիկանության հանդեպ հանրային հավատի ու վստահության ամրապնդումն է, այլեւ ոստիկանության անշրջելի արդիականացումը կոնկրետ գործով հավաստելը: Ոստիկանության պետը նշեց, որ ստորաբաժանումն առանձնանում է հատուկ պատրաստականությամբ. անձնակազմը տիրապետում է օտար լեզուների, մարտարվեստի հնարքների, առաջին բուժօգնության հմտություններին եւ այլն: Սակայն, շեշտեց Վլադիմիր Գասպարյանը, անհրաժեշտ է մշտական ինքնադաստիարակություն եւ ինքնակատարելագործում՝ ոստիկանության մարտունակությունը մշտապես բարձր պահելու եւ ժամանակին համաքայլ ընթանալու համար:

Վլադիմիր Գասպարյանը երիտասարդ իրավապահներին կոչ արեց միշտ հիշել, որ իրենց առաքելությունն անմնացորդ ծառայությունն է հասարակությանը, ծառայողական պարտականությունների լիարժեք ու նորովի կատարումը, քաղաքացու ոչ միայն պահապանը, այլեւ հարազատն ու մերձավորը լինելու պատրաստակամությունը: Վլադիմիր Գասպարյանը կրկին հիշեցնելով, որ ոստիկանությունը ուժեղացված ծառայություն է իրականացնելու «Վերջին զանգի» միջոցառումների ընթացքում՝ ընդգծեց ստորաբաժանման՝ հենց այդ օրը ծառայության անցնելու խորհրդանշական իմաստը:

Հանդիպման ավարտին ոստիկանության պետ Վլադիմիր Գասպարյանը ստորաբաժանման աշխատակիցներին շնորհավորեց ծառայության անցնելու կապակցությամբ եւ մաղթեց, որ հավատարիմ լինեն իրենց երդմանը ոչ միայն որպես զինակիցներ, այլեւ մեկ ընտանիքի անդամներ, որոնց վարքն ու գործը պիտի օրինակելի դառնան: