«Առեքսիմբանկ»-ի աշխատակիցը սպանել է տարադրամի փոխանակմամբ զբաղվողին

Այսօր՝ մայիսի 27-ին, սպանություն է տեղի ունեցել Արմավիրի մարզում:

Ինչպես Արմավիրի մարզից Tert.am-ին հայտնել է ֆոտոլրագրող Գագիկ Շամշյանը, ոստիկանության քրեական հետախուզության գլխավոր վարչության ոստիկանության Արմավիրի մարզային վարչության և Վաղարշապատի բաժնի աշխատակիցները, համատեղ իրականացնելով օպերատիվ տվյալները, «Զվարթնոց» օդանավակայանից սպանություն կատարելու կասկածանքով Վաղարշապատի բաժին են բերման ենթարկել Էջմիածին քաղաքի Մաշտոցի փողոցի բնակիչ, 33-ամյա Մարատ Սարգսյանին:

Ոստիկանությունը, օպերատիվ իրավիճակի վերահսկման արդյունքում, պարզել է, որ այսօր Մ. Սարգսյանի և Էջմիածին քաղաքի Կամոյի փողոցի բնակիչ, 48-ամյա Մայիս Խաչիկյանի միջև տարադրամի փոխանակման հարցերի շուրջ վիճաբանություն է տեղի ունեցել, որի ժամանակ Մ. Սարգսյանը սպանել է Մ. Խաչիկյանին, որից հետո իր անձնական օգտագործման մեքենայով սպանվածի մարմինը տեղափոխել է անհայտ ուղղությամբ, իսկ ինքը՝ դիմել փախուստի:

Գ. Շամշյանը հայտնում է, որ էջմիածինցիներն իրեն պատմել են, որ Մ. Խաչիկյանը զբաղվում էր տարադրամի փոխանակմամբ, իսկ սպանություն կատարողը աշխատում է «Առեքսիմբանկի» Էջմիածնի մասնաճյուղում՝ որպես վարկային բաժնի առաջատար մասնագետ:

Այս պահին ոստիկանության կողմից ստեղծվել են օպերատիվ-քննչական մի քանի խմբեր, որոնք առանձին-առանձին ղեկավարում են ոստիկանության քրեական հետախուզության գլխավոր վարչության 2-րդ վարչության պետ Ալիկ Մարգարյանը, ոստիկանության Արմավիրի մարզային վարչության պետ Արամ Զաքարյանը, Վաղարշապատի ոստիկանության պետ Գևորգ Խաչատրյանը և ոստիկանության քննչական գլխավոր վարչության Արմավիրի մարզի քննչական բաժնի Վաղարշապատի քննչական բաժանմունքի քննիչ Գոռ Ավանեսյանը:

Արդեն հայտնաբերվել է հանցագործություն կատարողի՝ «Նիսան» մակնիշի 30 ԼՏ 778 համարանիշի ավտոմեքենան Վաղարշապատից դեպի Չյոբանքարա գյուղ տանող գերեզմաններում, իսկ ավտոմեքենայից մոտ 5 կմ հեռավորության վրա՝ անջուր ջրանցքի մեջ հայտնաբերվել է սպանվածի դին:

Ըստ նախնական տեղեկությունների՝ սպանվածի մարմնի վրա կան դանակի մի քանի հարվածների հետքեր: Գ. Շամշյանը հայտնել է, որ սպանություն կատարած բանկի աշխատակիցը քննչական խմբին մատնացույց է արել այն վայրը, որտեղ հանցագործությունը կատարելուց հետո ավազի մեջ է շպրտել դանակը: Այդ հատվածում` Մաշտոցի փողոցի առաջին փակուղու 2-րդ տան մոտ, նա ավազի միջից հանել և քննչական մարմնին է ներկայացրել սպանության գործիք դանակը:

Գ. Շամշյանը հայտնում է, որ իր տեղեկություններով, նա արդեն ինքնախոստովանական ցուցմունք է տվել:

Փաստի առթիվ հարուցվել է քրեական գործ ՀՀ քրօրի 104 հոդված 1-ին մասի (սպանություն) հատկանիշներով: Լուսանկարը՝ Գագիկ Շամշյանի: