Կոմայգում կրակոցներ են հնչել

Այս գիշեր Երևանի քաղաքապետարանի դիմաց գտնվող Կոմայգու մոտ կանգնած մի խումբ տրանսգենդերներ վրա հարձակում է տեղի ունեցել: Այս մասին հաղորդում է Epress.am-ը:

Ոստիկանությունից հայտնում են, որ մայիսի 29-ին, ժամը 01.45-ին, ոստիկանության Երևան քաղաքի վարչության հերթապահ մասից ոստիկանության Կենտրոնականի բաժնում հաղորդում է ստացվել, որ իրենց է զանգահարել 1991 թ. ծնված Գևորգ Թ.-ն և հայտնել, որ անհայտ անձինք «Տոյոտա Պրադո» ավտոմեքենայի սրահից օդամղիչ ատճանակով կրակել են իր և 1969 թ. ծնված Տիգրան Ք.-ի ուղղությամբ, ինչի հետևանքով ինքը ոտքի մասում ստացել է վնասվածք:

Ձեռնարկված օպերատիվ-հետախուզական միջոցառումների շնորհիվ Փ. Բուզանդի փողոցի թիվ 35 հասցեի մոտ հայտնաբերվել է «Տոյոտա Պրադո» մակնիշի ավտոմեքենան, որի վարորդը` 1990 թ. ծնված Գոռ Տ.-ն և ուղևորը՝ 1991 թ. ծնված Գրիգոր Ե.-ն, բերման են ենթարկվել բաժին, որտեղ Գոռ Տ.-ն ներկայացնելով «Բայկալ ՄՊ-654Կ» տիպի օդամղիչ ատրճանակը՝ հայտնել է, որ Երևանի քաղաքապետարանի մոտ գտնվող այգում Գևորգ Թ.-ի և Տիգրան Ք.-ի ուղղությամբ կրակել է ինքը: Գևորգ Թ.-ին և Տիգրան Ք.-ին տրվել են դատաբժշկի ուղեգրեր: Կատարվում է հետաքննություն: