Հայաստանում երեխաների իրավունքների պաշտպանության եռաստիճան համակարգը չի արդարացնում իրեն. Անահիտ Բախշյան

Երեխաների իրավունքերի պաշտպանության ոլորտում ամենակարևոր օրենսդրական քայլը, ըստ «Ժառանգություն» կուսակցության նախկին պատգամավոր Անահիտ Բախշյանի այն է, որ Ազգային ժողովում նախորդ տարի երախաների իրավունքների պաշտպանությանն ուղղված աշխատանքային խումբ ստեղծվեց: Լրագրողների հետ հանդիպման ժամանակ Բախշյանն ասաց, որ այդ խումբը բազմակուսակցական է և ներառված են բոլոր խմբակցությունների ներկայացուցիչները:

«Այն ստեղծվեց ԱԺ նախագահի հրամանով, բայց դրա տակ որևէ մեխանիզմ չդրվեց: Կարծում եմ՝ այդ գործընթացը շարունակական կլինի հինգերորդ գումարման Ազգային ժողովում»,- նշեց Անահիտ Բախշյանը:

Նա հայտնեց, որ այս տարվա մարտին վարչապետին ուղղված նամակ է գրել՝ առաջարկելով, որ երեխաների իրավունքների պաշտպանության ազգային հանձնաժողովում ԱԺ-ն ներկայացվածություն ունենա: Սոցիալական ապահովության նախարարն այս առաջարկը տարօրինակ էր համարել:

«Այդ հանձնաժողովը պարտավոր է տարին առնվազն չորս անգամ նիստ հրավիրել և քննարկել երեխաների իրավունքների հետ կապված հարցեր, սակայն անցած տարի մեկ անգամ է նիստ գումարվել՝ այն էլ ՅՈՒՆԻՍԵՖ-ի պնդմամբ: Կարելի է ասել՝ հնաձնաժողովը չի գործում այն նպատակների համար, որ դրված է»,- ասաց Բախշյանը:

Նա առանձնացրեց հատկապես հաշմանդամ երեխաների կրթության իրավունքի, խնամատար ընտանիքների պակասի խնդիրները ու հավելեց, որ Հայաստանում երեխաների իրավուքների պաշտպանության եռաստիճան համակարգը չի արդարացնում իրեն:

«Արևածաղիկ» մանկապատանեկան ամսաթերթի գլխավոր խմբագիր Զառուհի Բաթոյանն ընդգծեց, որ երեխայի իրավունքները չպաշտպանելը ևս իրավունքի ոտնահարում է:

«Եթե երեխան չունի կրթության հնարավորություն, ծնողների հետ ապրելու և անհրաժեշտ կենսապայմաներ ունենալու հնարավորություն, դա ևս երեխայի իրավունքների ոտնահարում է: Անպայման չի, որ ծեծեն կամ նվաստացնեն երեխային, որ դա նրա իրավունքների խախտում համարվի»,- նշեց Զարուհին՝ հավելելով, որ պետք է գերխնդիր լինի Հայաստանի ընդունած միջազգային կոնվենցիաների իրացումը: