Եթե չկա նախագիծ, բայց ինչ-որ բան քանդվել է, դա հանցագործություն է. Վազգեն Մանուկյանը՝ Փակ շուկայի մասին

Եթե չկա նախագիծ, բայց ինչ-որ բան քանդվել է, դա հանցագործություն է: Այսօր Փակ շուկայի հարցին նվիրված Հանրային խորհրդի մշակույթի ենթահանձնաժողովի քննարկման ժամանակ հայտարարեց խորհրդի նախագահ Վազգեն Մանուկյանը:

«Ամեն ամիս հասարակությունը ցնցվում է՝ մի բան քանդում են, մի բան կառուցում են: Պետք է քննարկենք, որ անընդհատ այսպիսի պրոբլեմներ չառաջանան: Կարևոր է, թե ո՞վ է տալիս թույլտվությունը, այն տրվե՞լ է, թե ոչ, ի՞նչ հիմքի վրա, կա՞ նախագիծ, թե ոչ»,- նշեց Մանուկյանը:

Մանուկյանի խոսքով՝ Մշակույթի նախարարության և քաղաքապետարանի կողմից ստեղծվել է հանձնաժողով, որը պետք է ուսումնասիրեր տիրող իրավիճակը: Հանձնաժողովի նախագահ, Ճարտարապետների միության նախագահ Մկրտիչ Մինասյանը նշեց, որ Փակ շուկայի շենքը պետության կողմից պահպանվող հուշարձանների ցանկում է: Նրա խոսքով՝ այդ ցանկում ընդգրկված շինությունները ենթակա են վաճառքի, սակայն սեփականատերը պետք է պարտավորագիր կնքի, որով սահմանվում են նրա իրավունքներն ու պարտականությունները:

«Հուշարձանի վաճառքի ժամանակ գնողին ասում են, որ դու պարտավորագիր ունես ստորագրելու, որ իրավունք չունես միջամտություն անես՝ մինչև չլինի համապատասխան հանձնաժողովների եզրակացությունը»,- ասաց Մինասյանը:

Հանրային խորհրդի մշակույթի ենթահանձնաժողովը մի բանում համակարծիք էր, որ օրեսնդրական կարգավորման դաշտում բացեր չկան, պարզապես օրենքները չեն գործում: «Օրեքները բավարար են, որ նման բաներ մեզ մոտ չլինեն»,- ասաց Մկրտիչ Մինասյանը՝ հավելելով, որ շուկայի սեփականատիրոջը պարտավորագիր չի տրվել, չեն ասել՝ ինչ իրավունք ունի, ինչ ձևով կարող է շենքն օգտագործել և այլն:

«Մեր ջանքերը նրան պետք է ուղղենք, որ սեփականատիրոջից պահանջենք, որ ամրացնի մնացած մասը և վերականգնի քանդված մասը»,- կարծիք հայտնեց Մկրտիչ Մինասյանը:

Վազգեն Մանուկյանի համոզմամբ՝ տեղի ունեցածը պատժի էլեմենտ պարունակում է և պետք է քրեկական գործ հարուցվի:

«Ինչո՞ւ կարելի է շուկան քանդել ու հետո ամբողջ ազգով մտածենք՝ ոնց վերականգնենք, իսկ կրպակում ծխախոտ վաճառողի գլխին գալիս կանգնում են, որ ՀԴՄ չի տալիս»,- ասաց Մանուկյանը: Նրա կարծիքով՝ մեր երկրում դատական միջոցներով հարցեր չեն լուծում, այլ լուծում են ախպերական ճանապարհով, ինչի պատճառով էլ նման հարցեր են առաջանում:

Իրավաբան Արմեն Տեր-Տաճատյանը ևս հաստատեց, որ օրեսնդրական դաշտը կարգավորված է, սակայն իրավաբանը կարծում է, որ պետք է սկսել պատասխանատու գերատեսչությունից՝ Մշակույթի նախարարությունից:

«Պետք է հաշվել վնասները և ներկայացնել սեփականիտիրոջը վնասների փսխհատուցման պահանջ: Կարծում եմ, որ իրավաբանությունը հիմնավորված է, բայց ոչ միայն սեփականատիրոջ նկատմամբ»,- ընդգծեց Տեր-Տաճատյանը:

Հանրային խորհրդի մշակույթի ենթահանձնաժողովը կպահանջի մեկ շաբաթվա ընթացքում կառույցի էսքիզային նախագիծը ներկայացնել, որից հետո պարզ կդառնան մնացած անելիքները: