Փաստաբանները հունիսի 11-ին գործադուլ են անելու՝ ի բողոք Վճռաբեկ դատարանի կամայականությունների

Հայաստանի Փաստաբանների պալատի մի խումբ փաստաբաններ երեկ հայտարարություն են տարածել՝ զգուշացնելով Վճռաբեկ դատարանի դատավորներին, որ հունիսի 11-ին իրենք հայտարարում են մեկօրյա գործադուլ: Փաստաբանների տարածած հայտարարությունում մասնավորապես ասված է, որ  դեռևս 2007 թվականից սահմանվեցին վճռաբեկ բողոքները վարույթ ընդունելու նոր չափանիշներ: Փաստաբանների համոզմամբ՝ Վճռաբեկ դատարանը, օգտվելով վճռաբեկ բողոքները վարույթ ընդունելու չափանիշների անորոշությունից, բազմիցս կամայականություն է դրսևորել այդ օրենքը կիրառելիս, որի արդյունքում իրենց հայտնի չէ գոնե մեկ դատական ակտ, որում վճռաբեկ բողոքը վարույթ ընդունելու որոշումը լիներ պատճառաբանված:

Հայտարարության մեջ նաև նշվում է. «Մեկ այլ լրջագույն խնդիր է հանդիսանում այն, որ Վճռաբեկ դատարանը, Սահմանադրությամբ կոչված լինելով ապահովելու օրենքի միատեսակ կիրառությունը, հենց ինքն է հաճախ անտեսում իր իսկ կողմից արտահայտած իրավական դիրքորոշումները, իսկ երբեմն կայացնում իր նախկին որոշումներին ուղղակիորեն հակասող նորանոր որոշումներ, առանց պատճառաբանելու, թե ինչո՞ւ է շեղվում սեփական նախադեպերից»:

Փաստաբանների պալատի անդամ Մնացական Սարգսյանը, որը նույնպես միացել է այս նախաձեռնությանը, Լուրեր.com-ի հետ զրույցում ասաց, որ Վճռաբեկ դատարանը չի պատճառաբանում, թե այս կամ այն վճռաբեկ բողոքն ինչու վարույթ չի ընդունում:

«Լինում են գործեր, որոնց ժամանակ նույնանման փաստական հանգամանքներում Վճռաբեկ դատարանը բողոքը վարույթ է ընդունում, օրենքի խախտումով կայացնում է որոշում: Նույն փաստական հանգամանքներով բողոք ենք ներկայացնում, մերժում է՝ առանց պատճառաբանության, թե ինչու վարույթ չի վերցնում: Մեզ համար անորոշ է՝ որն է ընտրության չափանիշը»,- ասաց Սարգսյանը:

Մեր հարցին, թե ինչու որոշեցին հիմա գործադուլ անել այն դեպքում, երբ վճռաբեկ բողոքները վարույթ ընդունելու նոր չափանիշներն ընդունվել են դեռ 2007-ին, փաստաբանը պատասխանեց.

«Փորձում ենք ինչ-որ բան փոխել ու տեսնում ենք, որ ապարդյուն են մեր բոլոր փորձերը: Նորից շարունակվում է նման գործելաոճը: Ամեն դեպքում ինչ-որ փոփոխություն պետք է որ լինի»:

Սարգսյանն ընդգծեց, որ և՛ դատախազը, և՛ դատարանը, և՛ փաստաբանը պետք է ղեկավարվեն քրեական դատավարության օրենսգրքերով, սակայն դատախազի և դատարանների հիմնավորումները չեն բխում օրենսդրությունից: Փաստաբանի խոսքով՝ դատարանները կաշկանդված են և իրենց նպատակն այն է, որ դատարանները լինեն անկախ: