CERN-ը հերքում է գերլուսային արագություններով նեյտրինոների գոյության հարցը

CERN-ը պաշտոնապես հերքել է գերլուսային արագություններով նեյտրինոների մասին տեղեկատվությունը, որը ստացվեր էր OPERA փորձի ընթացքում։ Այս մասին հայտնվում է կենտրոնի մամուլի հաղորագրության մեջ։

Հաղորդման մեջ բերվում են CERN-ի հետազոտությունների գծով տնօրեն Սերջիո Բերտոլուչիի խոսքերը, ուր նա հայտարարել է, որ ստացված արդյունքներն այն են «ինչ բոլորս հոգու խորքում սպասում էինք ստանալ»։

Իր խոսքով՝ գերլուսային արագություններով մասնիկների վերաբերյալ տվյալները փորձի սխալի հետևանք էին, ինչը ճշտվել է OPERA ծրագրի մրցակից Borexino, ICARUS և LVD փորձերի շնորհիվ, որոնք բոլորը ուսումնասիրությունների ընթացքում ֆիքսում են նեյտրինային փնջերի ժամանման պահը։

«Մենք կարողացել ենք բացահայտորեն ցուցադրել գիտական մեթոդի հզորությունը՝ անսպասելի արդյունքը հանձնվել էր հանրության դատին և հերքվել։ Գիտությունն այդպես է առաջ ընթանում», - հավելել է Բերտոլուչին։

Գերլուսային արագություններով մյուոնային նեյտրինոների գրանցման վերաբերյալ առաջին հաղորդագրությունները հայտնվել են 2011 թվականի սեպտեմբերի 23-ին։ Այն ժամանակ հաջողվել էր ցույց տալ, որ CERN-ի առաքած նեյտրինոները Գրան-Սասո են հասնում հաշվարկային ժամանակից 60 նանովայրկյան ավելի շուտ։ Որպես հետևանք, ստացվում էր, որ մասնիկները շարժվում են 1,0000248 լուսային արագությամբ։

Վերջին մի քանի ամիսների ընթացքում ի հայտ էին եկել մեծ քանակությամբ տարաբնույթ բացատրություններ՝ կապված ինչպես տեսական, այնպես էլ փորձի կիրառական իրացման հետ։ Մասնավորապես, հիմնական բացատրությունը մալուխի թույլ միացումն էր։