«Արմ Սվիթը» չփակեցին, բայց 8 միլիոնի վնաս հասցրին

Ինչպես արդեն հայտնել է Լուրեր.com-ը, «Արմ Սվիթ» ՍՊԸ-ում այսօր լարված իրավիճակ էր։ Մեզ ահազանգած քաղաքացին հայտնել էր, որ «Գործարան են ներխուժել դատախազության Մալաթիա–Սեբաստիա վարչական շրջանի տարածքային բաժնի աշխատողները։ Նրանք ուզում են փակել գործարանը, արտադրությունը կանգեցնել, և այդքան մարդ կմնա առանց աշխատանքի»։

Դեպքի վայր մեկնած մեր լրագրողն ականատես եղավ հետևյալ տեսարանին. գործարանի աշխատանքը դադարեցված էր, դրսում կանգնած էր շտապօգնության մեքենա, բակում և վարչական մասի միջանցքներում հավաքված էին աշխատողները, ովքեր խուճապի մեջ էին, քանի որ ոչ ոք նրանց չէր բացատրել՝ ինչու էին իրականում գործարան ներխուժել ոստիկանները։ նրանք միայն գիտեին, որ դա սովորական ստուգում չէր, քանի որ ցանկանում էին տանել համակարգիչները, և աշխատողները, համոզված լինելով, որ դա արդեն գործարանի փակում է նշանակում, դուրս էին եկել բողոքելու՝ ասելով, որ ոչ մի դեպքում թույլ չեն տա գործարանից ինչ-որ բան դուրս հանել։ 

Դրսում և միջանցքներում հսկողություն իրականացնող ոստիկաններից ևս չհաջողվեց պարզել, թե ինչ ստուգումներ են արվում ներսում։

Զրույցի ժամանակ աշխատողները բողոքում էին տարբեր մարմինների կողմից իրականացվող հաճախակի ստուգումներից։ «Ոնց որ մարդու հետևից ընկած լինեն, չեն թողնում՝ գործարանը նորմալ աշխատի»,-ասում էին նրանք։ Նրանք նաև չափազանց վրդովված էին գործազրկության հեռանկարից, քանի որ նրանցից շատերը տարիներ շարունակ աշխատում են գործարանում, և այդ աշխատանքն իրենց ընտանիքի ապրուստը հոգալու միակ աղբյուրն է։

Անորոշ ու լարված վիճակում մոտ մեկ ժամ սպասումի արդյունքում «Արմ Սվիթ» ՍՊԸ մի քանի աշխատողների տեղափոխեցին հիվանդանոց, քանի որ, ինչպես ասաց աշխատողներից մեկը, նյարդային լարվածությունից մարդիկ նախաինֆարկտային վիճակի էին հասել։

«Արմ Սվիթ» ՍՊԸ հիմնադիր Մանվել Ղարիբյանի շահերը պաշտպանող փաստաբան Հայկ Ալումյանը փորձում էր բանակցել ոստիկանության ներկայացուցիչների հետ, որպեսզի նրանք համակարգիչները տանելուց առաջ գոնե ստուգեն՝ արդյո՞ք այնտեղ կա այն, ինչ իրենք փնտրում են։ Բանակցություններն արդյունք չտվեցին, և ոստիկանության աշխատակիցները հեռացան՝ իրենց հետ տանելով «Արմ Սվիթ» ՍՊԸ համակարգիչը։ Նրանց հեռանալուց մի քանի րոպե անց գործարանն սկսեց աշխատել, սակայն մի քանի ժամվա պարապուրդի պատճառով գործարանը մոտ 8 մլն. դրամի վնաս է կրել։

Տեղի ունեցածի մասին հստակ տեղեկություններ հաջողվեց իմանալ միայն ոստիկանության հեռանալուց հետո։ «Արմ Սվիթ» ՍՊԸ սեփականատեր Մանվել Ղարիբյանը և փաստաբան Հայկ Ալումյանը պատմեցին, որ Ոստիկանության քննչական գլխավոր վարչության Մալաթիայի քննչական բաժնի աշխատակիցները գործարանի հաշվապահությունում խուզարկություն էին սկսել։

Խուզարկության պատճառը դատարանում գտնվող «Արմ Սվիթ» և «Էկոֆուդ» ընկերությունների հայցն է: «Էկոֆուդը» մեղադրում է «Արմ Սվիթին» իր ընկերության մտավոր սեփականությունը հանդիսացող շոկոլադե կոնֆետների ապրանքային նշանների ապօրինի օգտագործման համար: Մանվել Ղարիբյանը վստահեցրեց, որ իրենք այժմ այդ անվանումներով կոնֆետներ չեն արտադրում։ 

Ինչպես նշեց փաստաբան Հայկ Ալումյանը, խուզարկության թույլտվության մեջ նշված չի եղել խուզարկության նպատակը, ինչն օրենքի խախտում է։ Մինչդեռ խուզարկությունն իրականացնող Մալաթիայի քննչակական բաժնի ավագ քննիչ Աշոտ Օհանյանն առգրավել է գլխավոր համակարգիչը՝ առանց գոնե համոզվելու, որ այնտեղ առկա են իր կողմից քննվող գործին առնչվող նյութեր։ 

«Սա գլխիվայր շուռ է տալիս դատական գործը»,-ասաց Ալումյանը՝ ավելացնելով, որ ամբողջ համակարգիչը տանելով՝ քննիչը կարող է ապօրինաբար ծանոթանալ, օրինակ, առևտրային գաղտնիք հանդիսացող տեղեկությունների, ինչպես նաև պարալիզացվում է գործարանի աշխատանքը։ «Քննիչը պիտի տաներ միայն այն, ինչը կապ ունի քրեական գործի հետ, նա չի կարող գալ այստեղ և իրեն դուր եկած ցանկացած բան տանել»,-ասաց Ալումյանը։