Իրավապահ մարմինների աշխատակիցների մեքենան հայտնվել է Սևանա լճում. նրանցից մեկը եղել է հարբած

Այսօր՝ հունիսի 9-ին, արտակարգ դեպք է տեղի ունեցել Գեղարքունիքի մարզում: Ինչպես դեպքի վայրից Tert.am-ին հայտնում է ֆոտոլրագրող Գագիկ Շամշյանը, Սևան-Գավառ ավտոճանապարհի 2-րդ կմ հատվածում «ԲՄՎ» մակնիշի ավտոմեքենայի վարորդը դուրս է եկել հանդիպակաց գոտի, բախվել ճանապարհի երկաթյա պատնեշներին և հայտնվել լճում:

Բարեբախտաբար զոհեր և վիրավորներ չկան: Վարորդի հետ եղել է մեկ ուղևոր, նրանք կարողացել են դուրս գալ լճից:

Գ. Շամշյանը հայտնում է, որ իր նախնական տեղեկություններով վարորդն ու ուղևորը ոստիկանության և դատախազության աշխատակիցներ են, ովքեր վթարի վայրում իրենց լկտի են պահել: Մասնավորապես նրանցից մեկը, ով, հավանաբար եղել է մեքենայի վարորդը, եղել է հարբած վիճակում և խոչընդոտել է Շամշյանի աշխատանքը: Ավելի ուշ ոստիկանները նրան տեղափոխել են Ոստիկանության Սևանի բաժին:

Գ. Շամշյանը հայտնում է նաև, որ ավտոմեքենայում հայտնաբերվել է ոստիկանի ծառայողական վկայական Նորայր Պետրոսյան անվամբ և ոստիկանության կրտսեր սերժանտ կոչումով:

Արդեն դեպքի վայր են ժամանել Ճանապարհային ոստիկանության 2-րդ սպայական գումարտակի 4-րդ վաշտի աշխատակիցները՝ հրամանատար Սերգեյ Հակոբյանի գլխավորությամբ:

Դեպքի վայրում են նաև ՀՀ Արտակարգ իրավիճակների նախարարության Փրկարար ծառայության Գեղարքունիքի մարզի Սևանի հրշեջ փրկարար ջոկատի 1 մարտական հավարկ և Հայաստանի ջրափրկարարական ջոկատը՝ երկու ջրասուզակով: Այս պահին ջրասուզակները փորձում են հատուկ ճոպանի միջոցով և կռունկի օգնությամբ դուրս բերել ավտոմեքենան: