Ամերիկան կարող է ջնջել Ադրբեջանը, բայց չի անում և գիտենք ինչու. քաղաքագետ

«Լեռնային Ղարաբաղի հակամարտության կարգավորման վերաբերյալ ամերիկացի համանախագահ Ռիչարդ Հոգլանդի ասածը պետք չէ հայտարարություն որակել, քանի որ հայտարարության համար նախևառաջ պետք էր գրավոր տեքստ՝ հաստատված  ՄԽ մյուս համանախագահների կողմից»,-այս մասին այսօր ԼՈւՐԵՐ.com-ի հետ զրույցում ասաց քաղաքագետ Սերգեյ Շաքարյանցը:

Քաղաքագետի խոսքով՝ իմանալով, որ Հոգլանդին պետք է փոխարինի ուրիշ դիվանագետ՝ ասվածը պետք է հաստատվեր մյուս համանախագահների կողմից, հակառակ պարագայում՝ ստացվում է, որ Հոգլանդը պաշտոնաթողությունից առաջ ընդամենը որոշել է մի բան ասել ու գնալ: 

Հարցին՝ արդյոք Ռիչարդ Հոգլանդի կողմից ԼՂ հակամարտության կարգավորման 6 հիմնական կետերի հրապարակումը կարելի՞ է դիտարկել նաև Սերժ Սարգսյան-Վլադիմիր Պուտին հանդիպման համատեքսատում, Սերգեյ Շաքարյանցը պատասխանեց. «Ես այս երկու գործընթացների միջև որևէ զուգահեռ չէի անցկացնի: Ընդամենը ամերիկացիները ևս մեկ անգամ ցույց տվեցին իրենց քաղաքականության իրական երեսը: Ամերիկան շարունակում է հանդիսանալ Թուրքիայի և Ադրբեջանի հովանավորը և Ամերիկան իրականում երբեք էլ դա չի թաքցրել, չէ՞ որ ԱՄՆ նախագահ Դոնալդ Թրամփն ունի նավթային խոշոր ներդրումներ Բաքվում: Այս երկրում խոշոր փայաբաժիններ ունեն նաև ԱՄՆ բարձրաստիճան պաշտոնյաները՝  կոնգրեսականները և դիվանագետները, և, բնական է, որ նրանք չեն ցանկանա Ադրբեջանի հետ իրենց հարաբերությունները փչացնել»:

Մեր զրուցակցի համոզմամբ՝ Արցախի հարցում ԱՄՆ-ն և այլ խոշոր տերություններ առաջնորդվելու են իրենց քաղաքական և տնտեսական շահերով և պարզ է դառնում, թե ինչու են Արցախի հիմնահարցի լուծումն այսպես ձգձգում. «Ինչ է՝  ԱՄՆ-ն չի՞ կարող ջնջել, ոչնչնացնել  Ադրբեջանը ոչնչացնել. կարո՛ղ է, բայց չի անում և գիտենք՝ ինչու: Ամերիկացիների  և Թուրքիայի ուզածն է՝ տասնամյակներ շարունակ երկարաձգել Արցախի հարցը: Այնպես որ՝ այստեղ նոր բան չկա, ընդամենը  Մադրիդյան սկզբունքներում առկա որոշ կետեր փոխել են՝ ի վնաս հայերի, հօգուտ՝ Ադրբեջանի. օրինակ՝ հանրաքվեի հարցը, որը մադրիդյան փաստաթղթի մեջ երկրորդ կետն էր, հիմա օդի մեջ կախված է մնացել: 

Աղավնի Սուքիասյան