Ժիրայր Սեֆիլյանի ընտանիքի անդամներն այսուհետ կարող են այցելել նրան

Ժիրայր Սեֆիլյանի տեսակցությունների արգելքը վերացնելու համար այսօր՝ օգոստոսին 25-ին, դատարանը որոշեց համապատասխան գրություն ուղարկել «Արմավիր» ՔԿՀ-ի պետին:

Դատավոր Տաթևիկ Գրիգորյանը նշեց, որ Ժիրայր Սեֆիլյանի ընտանիքի անդամներն այսուհետ կարող են տեսակցել նրան. «Նկատի ունենալով, որ պաշտպանության կողմը չներկայացրեց Սեֆիլյանի կողմից տեսակցությունների արգելքը վերացնելու միջնորդություն, դատարանը որոշում է իր նախաձեռնությամբ անդրադառնալ այս հարցին և ապահովել ամբաստանյալ Ժիրայր Սեֆիլյանի կողմից ընտանիքի անդամների  հետ կանոնավոր կապը պահելու պահանջը:

Ղեկավարվելով Քրեական դատավարության օրենսգրքով ու «Ձերբակալված և կալանավորված անձանց պահելու մասին» ՀՀ օրենքով՝ դատարանը որոշում է կայացնում ամբաստանյալ Ժիրայր Սեֆիլյանի տեսակցության արգելքը՝ կապված ընտանիքի անդամների հետ, մասնավորապես, կնոջ և երկու զավակների, վերացնել», - ասաց դատավորը:

Ինչպես արդեն տեղեկացրել ենք՝ մինչ այս՝ դատավոր Տաթևիկ Գրիգորյանը մերժել էր Ժիրայր Սեֆիլյանի և Ներսես Պողոսյանի նկատմամբ կիրառված սանկցիաները վերացնելու մասին՝ փաստաբանի միջնորդությունը:

Ժիրայր Սեֆիլյանը մեղադրվում է մի խումբ անձանց հետ, զենքի գործադրմամբ, շենքեր, շինություններ, հաղորդակցության և կապի միջոցներ զավթելու փորձի մեջ, այդ թվում՝ Երևանի հեռուստաաշտարակը, ինչի ընթացքում էլ վերջինս կազմակերպել է մի խումբ անձանց կողմից ապօրինի կերպով զենք և ռազմամթերք ձեռք բերելը, փոխադրելը և տարբեր վայրերում դրանք ապօրինի կերպով պահելը: 

Հիշեցնենք՝ Ժիրայր Սեֆիլյանին մեղադրանք է առաջադրվել մի խումբ անձանց հետ նախնական համաձայնությամբ, 24.04.2015 թվականին Երեւան քաղաքում բռնություն գործադրելով, գույք ոչնչացնելով եւ վնասելով, ինչպես նաեւ իշխանության ներկայացուցչին զինված դիմադրություն ցույց տալով արտահայտված, հասարակական անվտանգությունը վտանգող զանգվածային անկարգություններ հրահրելու ուղղակի դիտավորությամբ, 2014 թվականի մայիսից դրա կազմակերպմանն ուղղված նախապատրաստական գործողություններ կատարելու համար:

Բացի այդ, ըստ մեղադրանքի, 2015 թվականի նոյեմբերից մինչեւ 2016 թվականի մայիսի 18-ն ընկած ժամանակահատվածում, կազմակերպված խմբի կազմում ապօրինի կերպով ձեռք է բերել, պահել եւ փոխադրել հրազեն եւ ռազմամթերք, նպատակ ունենալով զենքի գործադրմամբ, կյանքի համար վտանգավոր բռնություն գործադրելով զավթել եւ պահել ռազմավարական նշանակության շենքեր, շինություններ, սակայն իր կամքից անկախ հանգամանքներով՝ ավարտին չի հասցվել: Սեֆիլյանին մեղադրանք է առաջադրվել Քրեական օրենսգրքի 35-225-րդ հոդվածի 1-ին մասով, 35-219-րդ հոդվածի 3-րդ մասի 1-ին կետով:

Սեֆիլյանն ամբողջությամբ շինծու է որակում մեղադրանքները՝ դրանք կապելով իր քաղաքական գործունեության հետ: