Սարդարապատում ներկայացվեց 2018-ի սցենարը

Վերլուծական 26 Օգոստոս, 2017 22:00

Սերժ Սարգսյանը Սարդարապատում մասնակցել է Հայաստանի ռազմական ուսումնական հաստատությունների շրջանավարտների հավաստագրերի հանձնման արարողությանը: Արարողությանը նրա գլխավորությամբ մասնակցել են ԱԺ նախագահը, վարչապետ Կարեն Կարապետյանը, Սահմանադրական դատարանի նախագահը, պաշտպանության նախարարն ու ոստիկանապետը: Այլ կերպ ասած՝ իշխանական ամբողջ շքախումբը՝ իր առանցքային դերակատարներով:

Ռազմական հաստատությունների շրջանավարտների հավաստագրերի հանձնումը փաստորեն այդպիսի պաշտոնական կազմի պայմաններում ստանում է բավականին բարձր կարգավիճակ, ինչն, անշուշտ, վերածվում է արտաքին մեսիջի:

Սոչիում տեղի ունեցած հանդիպմանը զուգահեռ, ԵԱՀԿ արդեն նախկին համանախագահի հնչեցրած թեզերը հայաստանյան քաղաքական դաշտին ստիպել են որոշակիորեն սթափվել և գործել ժամանակի պահանջներին համապատասխան: Երկրի քաղաքական, ռազմական էլիտան մեկ տեղ հավաքելով, նախագահը ուզում էր ընդգծել միասնականությունը արտաքին սպառնալիքների դեմ, որը առկա է իշխող վերնախավում:

Մյուս կողմից կարելի է ենթադրել, որ Սերժ Սարգսյանը Սոչիի հանդիպմանը լուծել էր բոլոր խնդրահարույց հարցերը, առնվազն որոշակի ժամանակահատվածի համար, ինչից հետո էլ Սերժ Սարգսյանը առիթը օգտագործել է և ցուցադրել իր գերագույն գլխավոր հրամանատարությունը, այդ թվում՝ իշխող համակարգի վրա:

Այսինքն՝ սկզբունքային խնդիրը՝ համակարգի կառավարման ղեկն իր ձեռքում պահելու ռուսական լեգիտիմության հարցը, Սերժ Սարգսյանը արդեն իսկ լուծել է:

Ինչ վերաբերվում է վարչապետին, ապա նա Սարդարապատում ակնհայտորեն անտրամադիր էր, թերևս, քաջ գիտակցելով Սերժ Սարգսյանի կողմից գծագրվող նոր համակարգում իրեն վերապահված տեղն ու դերը:

Կարեն Կարապետյանն իշխանությանը երկչոտ հայտ ներկայացրել է, սակայն նրա օրակարգն այնքան ապաքաղաքական է, որ տպավորություն է, թե նա մասնակցում է ոչ թե անկախ երկրի իշխանության ձևավորման գործընթացի, այլ «Գազպրոմի» դուստր ձեռնարկության մենեջերի թափուր տեղի մրցույթի:

Գուցե Կարապետյանը հենց այդ կարգավիճակում էլ պատկերացնում է Հայաստանը, և պատահական չէ, որ անցած մեկ տարում նրա պաշտոնական այցերի աշխարհագրությունը սահմանափակվեց միայն հետխորհրդային տարածքով:

Սերժ Սարգսյանի ծրագրերի իրականացումը հեշտացվում է այնքանով, որ արտաքին կենտրոններին, այդ թվում` Մոսկվային, առավելապես հետաքրքրում է նոր իշխանության կանխատեսելիության գործոնը, և նրանք, մեծ հաշվով, անտարբեր են, թե ինչպիսի անհատականացված դրսևորում կունենա Հայաստանի նոր իշխանությունը:

Սարգսյանն, ըստ էության, այլընտրանք չունի ՀՀԿ-ում և հանդիսանում է իշխանության հիմքը հանդիսացող քրեաօլիգարխիայի կոնսենսուսը:

Իհարկե, չի կարելի բացառել, որ վարչապետ է դառնում Կարեն Կարապետյանը, սակայն ռեալ իշխանությանը շարունակում է տիրապետել Սերժ Սարգսյանը` ՀՀԿ նախագահի, պաշտպանության նախարարի, Անվտանգության խորհրդի ղեկավարի կամ այլ կարգավիճակով:

Սա միանգամայն հնարավոր տարբերակ է խորհրդարանական կառավարման համակարգում, որտեղ վարչապետն առաջին դեմք է, սակայն ամենևին էլ` իշխանության միակ կենտրոնը չէ: Հենց սա է Սերժ Սարգսյանի պարտադրած կեղծ օրակարգը, որի տակ ստորագրել է նաև խորհրդարանական և արտախորհրդարանական ընդդիմությունը:

Սակայն, ինչքան էլ նոր սահմանադրությունը ենթադրում է իշխանության բազմավեկտորություն` Հայաստանի քաղաքական համակարգը դրան ակնհայտորեն պատրաստ չէ և իրական ու ստվերային իշխանությունների բախումը հանգեցնելու է լուրջ բախումների:

Ստելլա Խաչատրյան