Ավերիչ ջրհեղեղ՝ Հյուսթոնում

ԱՄՆ Տեխաս նահանգում գտնվող Հյուսթոնի քաղաքապետ Սիլվեսթեր Թըրները պաշտպանել է ջրի տակ հայտնված քաղաքի բնակչությանը չտարհանելու իր որոշումը՝ ասելով, որ նա չի զղջում այդ մասին: Նա նշել է, որ ոչ մեկին հայտնի չէր փոթորկի ուղղությունը, այդ պատճառով անհնար էր մարդկանց հեռացնել վտանգի գոտուց, հայտնում է The Daily Mail-ը:

«Չի կարելի Հյուսթոն քաղաքում 2,3 միլիոն մարդու հանել փողոց: Դա վտանգավոր է: Եթե կարծում եք, որ իրավիճակն այժմ վատ է, պատկերացրեք ինչ կլիներ, եթե տարհանվելու հրաման տրվեր, այդ ժամանակ մղձավանջ կլիներ»,- ասել է Թըրները մամուլի ասուլիսի ժամանակ:

Նա հիշեցրել է Հյուսթոնի տարհանման փորձը 2005 թվականին «Ռիտա» փոթորկի ժամանակ, ինչի հետևանքով խցանումներ էին առաջացել և 100 մարդ էր զոհվել:

Նշենք, որ օդերևութաբանական ծառայության փոխանցմամբ՝  այս տարածքում տեղումները կկազմեն 50-100 սմ, ինչը կհանգեցնի հեղեղումների։ Հյուսթոնի քաղաքապետ Սիլվեստեր Թերների խոսքով՝ ավելի քան 2000 զանգ է ստացվել մարդկանցից, ովքեր օգնություն են խնդրել ջրհեղեղի պատճառով։ Երկու բնակելի համալիրներ տարհանվել են։ Հյուսթոնում բնակվող մոտ 70 հազար մարդ մնացել է առանց էլեկտրականության։