Այրվում է «Նաիրիտը», «այրվում է» թալանված» գույքը

Հայաստանի տնտեսության ողնաշար համարվող Նաիրիտ գործարանում, այսօր՝ օգոստոսի 28-ին պայթյուն է լսվել, որից հետո հրդեհ է բռնկվել:

ՀՀ ԱԻՆ –ը պաշտոնապես տեղեկություն է տրամադրել այն մասին, որ հրդեհի բարդության «թիվ 3» կանչով դեպքի վայր են մեկնել տաս մարտական հաշվարկ և Ճգնաժամային կառավարման կենտրոնի արտակարգ իրավիճակների արձագանքման և օպերատիվ խմբերը:

Առաջին հայացքից արտակարգ դեպք է, որ գրեթե ամեն օր պատահում է: Սակայն «Նաիրիտում» բռնկված հրդեհը մի շարք կասկածներ է առաջացնում:

«Նաիրիտ» գործարանում սա միակ հրդեհը չէ: Հիշեցնենք, որ 2009 թվականի մարտին փոքր հրդեհ էր տեղի ունեցել գործարանում, որը մի քանի րոպեների ընթացքում մեկուսացվել էր: Նույն թվականի մայիս ամսին պայթյուն և հրդեհ՝ կրկին Նաիրիտ գորածարանում: Ցավոք, այդ անգամ ողբերգական հետևանք էր եղել․ 3 մարդ մահացավ:

Այսօր էլ ուժգին պայթյուն է հնչել, որից հետո խոշոր հրդեհ է բռնկվել: Մարդկային կորուստների մասին դեռ չի հաղորդվում: Հուսանք զերծ կմնանք սարսափելի լուրեր լսելուց: Մինչ ԱԻՆ փրկարարները կմեկուսացնեն հրդեհը մարդկանց մի հարց է հուզում:

Ինչո՞ւ պայթեց «Նաիրիտ» գործարանը և ո՞ւմ էր ձեռնտու այդ պայթյունը: Տարիներ շարունակ, հատկապես վերջին տաս տարիներին գործարանի աշխատակիցները պնդում են, որ գործարանի գույքը թալանվել է: Աշխատակիցները պնդում են, որ իշխանությունները էներգետիկ հսկան միտումնավոր տարել են սննկացման:

«Նաիրիտի» աշխատակիցները բողոքի ցույցերի են դուրս գալիս՝ պահանջելով վերագործարկել գործարանը, որպեսզի հարյուրավոր մարդիկ կարողանան վաստակել իրենց ապրուստը: Մինչ հասարակ բանվորից մինչև նախկին տնօրեն, ամեն հինգշաբթի կառավարության դիմաց իրենց բողոքն են արտահայտում և պահանջում գործարկել «Նաիրիտը», գործարանը պայթում է՝ այրելով մարդկանց վերջին հույսը:

Մեր քաղաքացիների մեծ մասը չի հավատալու, որ այս հրդեհը պատահական էր, կամ թե անփույթ աշխատանքի հետևանք: Մարդիկ այս պատահարի մեջ տեսնելու են դիտավորություն: Այրվել է գործարանը, այլևս ոչ մի «Նաիրիտ»: Հրդեհը այրեց մարդկանց հույսը: Հրդեհը, հավանաբար «այրել է» այն միլիոնավոր դոլարների գույքը, որոնք տարիներ շարունակ գողացվել են և յուրացվել:

Կառավարությունը մինչ այս հրաժարվում էր աուդիտ իրականացնելուց: Այս հրդեհից հետո, վստահ ենք, կառավարությունը կողմ կլինի աուդիտի անցկացմանը: Բանն այն է, որ ամբողջ պակասորդը «այրվել» է այսօրվա պայթյունից և հրդեհից:

Իշխանությունները մեզ կարող են մեղադրել դավադրություն հյուսելու մեջ, սակայն մենք՝ լրագրողներս չէ, որ դավադրություն ենք հյուսում: Դավադրությունը այսօրվա պայթյունն էր՝ բռնկված խոշոր հրդեհով:

Արսեն Սանամյան