Վրոցլավում կայացել է հայ-լեհական մշակութային երեկո

Լեհաստանում ՀՀ դեսպանության պատվո հովանու ներքո, Վրոցլավի քաղաքապետարանի, Վրոցլավ քաղաքում գործող «Հայ-լեհական կապերի զարգացման կենտրոն» հասարակական կազմակերպության նախաձեռնությամբ օգոստոսի 26-ին Վրոցլավի կենտրոնական պուրակներից մեկում կազմակերպվեց «Ավելի լավ ճանաչենք միմյանց» խորագիրը կրող հայ-լեհական մշակութային երեկո:

Ինչպես տեղեկացրին ՀՀ ԱԳՆ մամուլի, տեղեկատվության և հասարակայնության հետ կապերի վարչությունից, միջոցառումը կազմակերպվել էր Հայաստանի և Լեհաստանի միջև դիվանագիտական հարաբերությունների հաստատման 25-ամյակի և Լեհաստանի հայ համայնքին շնորհված թագավորական արտոնության 650-ամյակի հոբելյանական միջոցառումների շրջանակներում: Երեկոյին մասնակցեց Լեհաստանում ՀՀ դեսպան Էդգար Ղազարյանը:

Օգոստոսի 27-ին Լեհաստանի Ունիեով քաղաքում Լեհաստանում ՀՀ դեսպանության, Ունիեովի քաղաքապետարանի և Ունիեովի ջրաբանական համալիրի կողմից կազմակերպվեցին «Հայկական օր» խորագրով միջոցառումներ` Լեհաստանի Հայկական հիմնադրամի, Հայ-լեհական հիմնադրամի, Կոլեի միջազգային համագործակցության կազմակերպության աջակցությամբ:

Միջոցառումները մեկնարկեցին Ունիեովի Թագավորական ամրոցի Ասպետական սրահում տեղի ունեցած պաշտոնական արարողությամբ, որի ընթացքում ելույթներով հանդես եկան Ունիեովի քաղաքապետ Յուզեֆ Կաչմարեկը, Լեհաստանում ՀՀ դեսպան Էդգար Ղազարյանը, Լուիձկե վոևոդության մարշալեկի տեղակալ Յոաննա Սկշիդլեվսկան, Լեհաստանի Հայկական հիմնադրամի նախագահ Մարթա Աքսենտովիչ-Բոհոսևիչը և այլք, ինչպես նաև հրապարակվեց Լուիձկե վոևոդիի ուղերձը:

Իր ելույթում դեսպան Էդգար Ղազարյանը, շնորհակալություն հայտնելով միջոցառման կազմակերպիչներին, մասնավորապես, նշեց, որ հայ-լեհական հարաբերությունների համար խորհրդանշական և հոբելյանական տարում «Հայկական օր» խորագրով միջոցառումների կազմակերպումը հրաշալի առիթ է ընձեռում՝ ներկայացնելու հայ ժողովրդի, Լեհաստանի հայ համայնքի պատմությունը, մշակույթը, ավանդույթները: Դեսպան Ղազարյանն ընդգծեց, որ Լեհաստանում հայերի մի քանի դարերի պատմությունը երկու ժողովուրդների անխախտ բարեկամության և համագործակցության լավագույն վկայություններից մեկն է:

Միջոցառման շրջանակներում ցուցադրվեց փաստավավերագրական ֆիլմ Լեհաստանի Անհայտ զինվորի խորհրդանշական Մայր Յադվիգա Զառուգևիչովայի մասին, տեղի ունեցավ «Հայերի ծառայությունը Լեհաստանին» և «Հայոց ցեղասպանությունը 1915 թվականին» խորագրով ցուցահանդեսների բացումը, անցկացվեց կտորի վրա հայկական զարդանախշերի և տառատեսակների նկարչության դասընթաց:

Միջոցառումների համերգային հատվածի շրջանակներում Ունիովի թագավորական ամրոցին կից բացօթյա ամֆիթատրոնում տեղի ունեցավ համերգ՝ Լեհաստանում բնակվող հայազգի երաժիշտներից կազմված «Հաբիարջան» էստրադային համույթի և արցախցի երգիչ Սարիբեկ Սարգսյանի մասնակցությամբ, որի ընթացքում ներկայացվեցին հայկական ժողովրդական, էստրադային և ժամանակակից կոմպոզիտորների ստեղծագործություններ: