Արթուր Թովմասյանն ու Արթուր Դավթյանը՝ Համաշխարհային ուսանողական խաղերում ելույթների մասին

Համաշխարհային ուսանողական խաղերի չեմպիոն Արթուր Թովմասյանը լրագրողների հետ հանդիպմանն ամփոփեց իր ելույթները Համաշխարհային ուսանողական խաղերում:

«Տպավորություններս դրական են: Սա մեր թիմային աշխատանքի արդյունքն էր: Եթե կա ոսկե մեդալ՝ դրա մեջ ահեռելի բաժին ունեն նաև Արթուր Դավթյանն ու գլխավոր մարզիչը, քանի որ նրանց թույլտվությամբ կարողացա մասնակցել եզրափակչին:

Պատասխանատվությունը և լարվածությունը մեծ էր, որովհետև այս դեպքում երկու հոգու համար էի պաասխանատվություն կրում՝ իմ և Արթուր Դավթյանի, քանի որ նրա փոխարեն էի հանդես գալիս և պետք է արդարացնեի սպասումները: Եթե ձախողվեի՝ կստացվեր՝ և՛ ես ձախողվեցի, և՛ թույլ չտվեցի Արթուրին՝ նվաճել գոնե բրոնզե մեդալ»:

Համաշխարհային ուսանողական խաղերին մասնակցած մարմնամարզիկ Արթուր Դավթյանն էլ, անդրադառնալով ելույթներին, ասաց, որ թիմակիցը՝ Արթուր Թովմասյանը, արդարացրեց սպասելիքները.

«Եզրափակչում դժվար կարողանայի գրանցել այն արդյունքը,  ինչ արդյունք  գրանցեց Արթուրը:  Դրա համար՝ զիջեցի: Ինքն այդ վարժությամբ կարող էր հաղթել:  Հնարավոր է՝ ես կարողանայի երրորդ տեղը գրավել,  բայց Արթուրն է՛լ ավելի շատ շանսեր ուներ»: