Նարկոբարոնը…

Պարզվում է` Կառավարության` օգոստոսի 1-ի օրակարգում ընդգրկվել է մի շատ հետաքրքրական հարց, որը որևիցե տրամաբանական բացատրության չի ենթարկվում. մարդիկ նպատակադրվել են ԵՊՀ-ին երեք տարի ժամկետով թմրամիջոցներ, հոգեմետ նյութեր և այլ միջոցներ ներմուծելու լիցենզիա տրամադրել: Խնդիրը, սակայն, այն է, որ որևիցե հիմնավորում այս բավական տարօրինակ որոշման համար նույն Կառավարությունը չի բերում ու չի բացատրում, թե Արամ Սիմոնյանին փաստացի թմրանյութերի առուծախի մեջ ներքաշելու ու այդպիսով նրանից յուրատեսակ նարկոբարոն կերտելու ողջ իմաստն ու նպատակը որն է:

Այն, որ ԵՊՀ-ն հատկապես վերջին տարիներին իր լավագույն օրերը չէ, որ ապրում է, հայտնի է բոլորին. տարեցտարի ավելի ու ավելի խորացող կոռուպցիան, ուսանողների` հետզհետե պակասող թվաքանակը, մատուցվող կրթության ոչ բարվոք որակը և այլ բացասական գործոնների առկայությունն այս բուհի պատերից ներս վաղուց են սասանել հասարակական վստահությունը կրթօջախի հանդեպ: Ճիշտ է` հայաստանյան մյուս բուհերը ևս իրենց մատուցած ծառայություններով առանձնապես չեն փայլում, ու դրանցում ևս խնդիրները քիչ չեն, սակայն ԵՊՀ-ում վխտացող պրոբլեմներն ակներև են հատկապես այն պատճառով, որ այն «մայր բուհի» համբավ ունի ու, ըստ տրամաբանության, պետք է էտալոնային համարվեր հայաստանյան մասշտաբներով:

Հիմա հարց է առաջանում` ո՞րն է Կառավարության որոշման բուն դրդապատճառը, և կամ ի՞նչ բացատրություն կարելի է գտնել Սիմոնյանին ամեն գնով հարստացնելուն միտված այս մտադրությանը: Նախ` անկասկած է, որ սա ոչ այլ ինչ է, եթե ոչ ԵՊՀ-ն «լևի» եկամուտներով ապահովելու մի խայտառակ փորձ, ապա` մի վատառողջ ձգտում` կոմերցիալիզացնելու Հայաստանի մայր բուհը: Հայտնի չէ` աշխարհում կա՞ նման փորձ, թե՞ Հայաստանը միակն է լինելու, որի մայր բուհը պաշտոնապես զբաղվելու է թմրանյութերի առքուվաճառքով: Եթե կա, ապա միմիայն ողբալ կարելի է, իսկ եթե մենք միակն ու անկրկնելին ենք, ուրեմն վայ մեզ ու մեր բուհին, որ թողած իր հիմնական գործառույթը` սերունդներին դաստիարակելն ու կրթելը, ստիպված է լինելու զբաղվել թմրանյութերի ներկրմամբ:
Ցավոք, երևում է` Սիմոնյանին հարստացնելու ոմանց ձգտումը չափից դուրս բուռն է, այն աստիճան կրակոտ, որ նրան ներքաշում են բավական կասկածելի բիզնեսի մեջ: Չնայած նկատենք, որ լավ էլ եկամտաբեր գործ են առաջարկում` ուղղակի կասկածելի հեռանկարով. բա որ բռնեն…

Նշենք, որ տեղեկությունը հրապարակվել է aravot.am կայքում

Դավիթ ԲԱԲԱՆՈՎ