Պատանդառուն մինչև աղջկան պատանդ պահելը՝ բիլիարդանոցի մոտ ծեծի է ենթարկել մի տղամարդու՝ փորձելով նրան էլ պատանդ պահել. նոր մանրամասներ

SHAMSHYAN.com-ի տեղեկություններով՝ երեկ՝ օգոստոսի 29-ին, Ռոստովյան փողոցի թիվ 15/4 հասցեում գտնվող, ժամանակավորապես չգործող «Վիքենդ» բիլիարդանոցում դանակի գործադրմամբ և սպանության սպառնալիքով Երևան քաղաքի Նոր Նորք վարչական շրջանի բնակիչ, 24-ամյա Մարի Թորոսյանին պատանդ պահած, ԱՄՆ-ից արտաքսված, այնտեղ սպանության համար դատապարտված, ինչ-որ հանցագործ խմբավորման անդամ, 31-ամյա Գոռ Հակոբյանը, ով Երևանում բնակվել է Դավիթ Բեկի փողոցի 1-ին թաղամասում, փորձել է պատանդ պահել ոչ միայն Մ. Թորոսյանին, այլև Երևան քաղաքի Ազատամարտիկների փողոցի բնակիչ, 86-ամյա Արամ Բադանյանին:

Ինչպես հայտնում է աղբյուրը, պատանդառուն փորձել է բռնի ուժով Ա. Բադանյանին տանել բիլիարդանոց, մինչ այդ հարձակվել է և, ձեռերով ու ոտքերով հարվածներ հասցրել նրա մարմնի տարբեր մասերին՝ պատճառելով մարմնական վնասվածքներ:

Ըստ տեղեկությունների՝ Ա. Բադանյանը մարմնական վնասվածքներով տեղափոխվել է Մուրացանի հիվանդանոց:

Ինչպես ավելի վաղ հայտնել էր SHAMSHYAN.com-ը, ՀՀ քննչական կոմիտեի ԵՔՔՎ Էրեբունի և Նուբարաշեն վարչական շրջանի քննչական բաժնի վարույթում քննվող քրեական գործով ձեռնարկվում էին մեծածավալ քննչական գործողություններ՝ պարզելու Էրեբունի վարչական շրջանում օգոստոսի 29-ին զենքի գործադրմամբ վտանգավոր բռնություն գործադրելով պատանդ վերցնելու դեպքի բոլոր հանգամանքները։

Ինչպես տեղեկացրել էին ՀՀ ՔԿ-ից, հաշվի առնելով քրեական գործի նկատմամբ հասարակության մեծ հետաքրքրությունը՝ տեղեկացրել էին, որ պարզվել է ենթադրյալ հանցագործություն կատարած անձի ինքնությունը, ով հանդիսանում է ազգությամբ հայ՝ 1986 թ. ծնված Գոռ Հակոբյանը, և նրա առնչությունը տուժողի հետ։ Հարցաքննվել էին խաղասրահի սեփականատերը, ականատես վկաները, զննվել դեպքի վայրում կատարված տեսագրությունները։

Նախնական տվյալներով՝ 31-ամյա տղամարդը վերջին տարիներին բնակվել է ԱՄՆ-ում, որտեղ ծանր հանցագործության համար դատապարտվել էր երկարատև ազատազրկման։ Հայաստան է ժամանել 4 ամիս առաջ՝ արտաքսվելով ԱՄՆ-ից։ Տուժածի հետ ծանոթացել է մոտ երկու ամիս առաջ՝ Հայաստանում։ Քննությամբ տվյալներ էին ձեռք բերվել, որ Գ.Հակոբյանը 24-ամյա կնոջ հետ «Վիքենդ» կոչվող չգործող բիլիարդի խաղասրահի տարածք էր մուտք գործել օգոստոսի լույս 29-ի գիշերը՝ ժամը 04-ի սահմաններում։ Իսկ օգոստոսի 29-ին՝ ժամը 15։30-ի սահմաններում, կոտրել էր խաղասրահի պատուհանների ապակիները, վնասել գույքը՝ ուշադրություն գրավելու համար։

Խաղասրահի մոտ հավաքվել էին բազմաթիվ քաղաքացիներ, դեպքի վայր էին ժամանել իրավապահ մարմինների աշխատակիցներ, որոնց ներկայությամբ տղամարդը, դանակը պահելով երիտասարդ կնոջ կոկորդի մոտ, կյանքի համար վտանգավոր բռնություն գործադրելով, պահանջել էր ներս հրավիրել 5 քաղաքացիների և փաստաբանի՝ հակառակ դեպքում սպառնալով սպանել նրան։ Պատանդին ազատ արձակելուն ուղղված բանակցություններն արդյունք չէին տվել. տղամարդը հրաժարվել էր ենթարկվել իրավապահ մարմինների աշխատակիցների օրինական պահանջներին։

Կնոջ կյանքին սպառնացող իրական վտանգը կանխելու նպատակով՝ ՀՀ ոստիկանության ԿՀԴՊ ԳՎ հատուկ նշանակության ջոկատի աշխատակիցների կողմից իրականացվել էր հատուկ գործողություն, որի ժամանակ նա ստացել էր հրազենային վնասվածք և տեղափոխվել բժշկական կենտրոն, որտեղ արձանագրվել էր Գ.Հակոբյանի կենսաբանական մահը։ Բժշկական կենտրոն տեղափոխված տուժած կնոջ մոտ բժիշկներն արձանագրել էին պարանոցի կտրած-ծակած վերքեր, ձախ հոնքային շրջանի պատռած վերքեր, կապտուկներ՝ մարմնի տարբեր մասերում։