Անվիճելի իրողություն՝ 2018-ին ընադառաջ

Սերժ Սարգսյանը այսօր ազգային անվտանգության խորհրդի նիստ է հրավիրել, որտեղ քննարկվել են պաշտպանության մասին օրինագծեր՝ պայմանավորված սահմանադրական փոփոխություններից բխող նոր իրողություններով: Սերժ Սարգսյանի համար ԱԽ նիստերը լինելու են առանցքային բաղադրիչներից մեկը այն գործիքակազմի, որով նա փորձելու է վերահսկողության տակ պահել 2018-ի վարչապետի և կառավարության խնդրի լուծումը, իսկ հետո նաև դրան հաջորդելիք անխուսափելի դիրքային արդեն տևական պայքարը, որ սպասվում է իշխանության ներսում արդեն 2022 թվականի ստատուս-քվոյի համար:

Հայաստանի քաղաքական օրակարգում 2018-ից հետո ապագա վարչապետի հնարավոր թեկնածուների հարցը շարունակում է մնալ գերակա։ Կարեն Կարապետյանը, ինչպես հայտարարել է, պատրաստ է կրկին մնալու վարչապետի պաշտոնում։ Լռում է Սերժ Սարգսյանը, խոսում են քաղաքական վերլուծաբանները, որոնց դիտարկումներով` Սերժ Սարգսյանը կարող է լինել ապագա վարչապետ և, ըստ էության, պետության ղեկավար։ ՀՀԿ-ի գաղափարական հատվածի ներկայացուցիչները, սակայն, պնդում են, որ Սերժ Սարգսյանը մտադիր չէ զբաղեցնելու վարչապետի պաշտոնը. նա շատ պարզ ասել է, որ իր քաղաքական կարիերան կապում է ազգային անվտանգության հետ, իսկ սա ենթադրում է այլ կարգավիճակ։ Անվտանգության խորհուրդը այս դեպքում, անկասկած, Սերժ Սարգսյանի այսպես ասած առաջնորդությունն ընդգծող կարևոր հարթակներից մեկն է, առավել ևս, որ նա իր քաղաքական պլաններում՝ դրանց անորոշությամբ հանդերձ, շեշտը դնում է անվտանգության խնդիրների վրա և դրանց վրա կառուցում իր այսպես ասած անփոխարինելիության «գաղափարը»:

Սերժ Սարգսյանի կադրային քաղաքականությունը երևի թե ամենաանկանխատեսելին է Հայաստանի երեք նախագահների շարքում: Դա ինչ որ առումով բխում է Սարգսյանի խառնվածքից, իսկ ինչ որ առումով էլ նրա իշխանության բնույթից ու հիմքերից: Այդ իշխանությունն իր հիմքով ամենաթույլն է բոլոր առումներով, և Սերժ Սարգսյանի համար կանխատեսելի քաղաքականությունը կլինի անթույլատրելի շքեղություն: Եթե մրցակիցները կարողանան կանխատեսել նրան, ապա Սերժ Սարգսյանը դիմադրության որևէ ռեսուրս չունի: Այսինքն, այսպես ասած բաց խաղում Սերժ Սարգսյանը շանս չունի:

Պակաս կարևոր չէ շեշտադրել նաև այն, որ եթե իրոք Սերժ Սարգսյանը 2018թ.-ին հռչակվի ՀՀ վարչապետ, ապա խորհրդարանի վերահսկողության առումով՝ նա առհասարակ խնդիր չի ունենալու, քանի որ ունենալու է հստակ քաղաքական հենարան այնտեղ ու, ըստ էության, հանդիսանալու խորհրդարանի ստվերային կառավարիչը՝ ՀՀԿ հին գվարդիայի գոնե մի մասին կրկին ակտիվացնելու փայլուն հնարավորություն ստանալով, ինչը, բնականաբար, է՛լ ավելի կուժեղացնի իր դիրքերը երկրի ներսում: Ու կստացվի՝ ֆորմալ առումով խորհրդարանի ղեկավար է հռչակվում մեկ այլ անձ, իսկ երկրի իրական ղեկը կրկին մնում է Սերժ Սարգսյանի ձեռքում, ում հետ ստիպված են լինելու համագործակցության եզրեր փնտրել անխտիր բոլորը. Սերժ Սարգսյանը, փաստացի, վերածվելու է ազգային առաջնորդի՝ ստանձնելով նաև խորհրդարանի ստվերային ղեկավարումը, իր թիկունքում ունենալով արդեն իսկ որոշումներ կայացնելու հնարավորությամբ օժտված Ազգային անվտանգության խորհուրդը:

Ստելլա Խաչատրյան