«Դիլիջան ազգային պարկի» տարածքում մարվել է բռնկված հրդեհի օջախը

Օգոստոսի 31-ին՝ ժամը 13:00-ի սահմաններում «Դիլիջան ազգային պարկ» ՊՈԱԿ-ի «Շամախյան տեղամաս» մասնաճյուղի թիվ 2 պահաբաժնում` զինվորական հրաձգարանին կից տարածքում  հրդեհ է բռնկվել:

Հրդեհը տեղայնացվել եւ մարվել է ազգային պարկի աշխատակիցների եւ զինվորականների համատեղ ուժերով: Անտառին էական վնաս չի պատճառվել: Այրվել է մոտավորապես  2,5 հա  խոտածածք  տարածք:

Հիշեցնենք, որ համաձայն ՀՀ բնապահպանության նախարար Ա. Մինասյանի 2017թ. հուլիսի 17-ի  N 232-Ա հրամանի` ՀՀ բնապահպանության նախարարության ենթակայության տակ գտնվող բնության հատուկ պահպանվող տարածքներում իրականացվում է շուրջօրյա խստացված  հսկողություն,  ձեռնարկվում  են կանխարգելիչ  միջոցառումներ:

«Խոսրովի անտառ» պետական արգելոցի այրված հատվածներում դեռեւս առկա են ծխացող օջախներ: Արգելոցի եւ ՀՀ ԱԻՆ հրշեջ փրկարարների կողմից իրականացվում են օջախների չեզոքացման աշխատանքներ եւ սահմանված է շուրջօրյա հսկողություն:

ՀՀ բնապահպանության նախարարության ենթակայության տակ գտնվող բնության հատուկ պահպանվող մյուս տարածքներում հրդեհների բռնկման դեպքեր չեն արձանագրվել: