Անկախ Արցախը 26 «տարեկան է» (լուսանկարներ)

Կեցցեն Արցախի անկախությունը կերտողները: Ահա այսպիսի պաստառների կարելի էր հանդիպել  Արցախի տարբեր շրջաններում սեպտեմբերի 2-ին, քանի որ հենց այդ օրը Արցախը հռչակվեց որպես պետություն և արդեն 26 տարի է ինչ ազատվել է բռնազավթումից։

Ստեփանակերտում տոնական միջոցառումները բավական մարդաշատ էին:

ՀՀ նախագահ Սերժ Սարգսյանը Արցախի նախագահ Բակո Սահակյանի, արցախահայության և տոնակատարությանը մասնակցելու նպատակով Հայաստանից ժամանած պաշտոնական պատվիրակության ու արտերկրից ժամանած հյուրերի հետ Վերածննդի հրապարակից առավոտյան հանդիսավոր քայլերթով այցելեցին Ստեփանակերտի հուշահամալիր, ծաղկեպսակ դրեցին և հարգանքի տուրք մատուցեցին Արցախի անկախության համար զոհված հայորդիների հիշատակին:

Երկրապահ կամավորականների միությունը, գեներալ Մանվել Գրիգորյանի անունից ևս ծաղկեպսակ դրեց զոհված հերոսների հուշահամալիրի մոտ, ապա՝ Շուշիում Սպարապետ Վազգեն Սարգսյանի արձանի մոտ տեղի ունեցավ ծաղկադրում:

Պաշտոնական միջոցառումներն ավարտվեցին երեկոյան ընդունելությամբ և Վերածննդի հրապարակում տեղի ունեցած համերգով, որին ներկա էին հազարավոր հայեր տարբեր տեղերից՝ Հայաստանից, Սփյուռքից:

Քրիստինա Աղալարյան,

Արցախ