ՀՅԴ -ն կփոխհատուցի սփյուռքով

Սեպտեմբերին տեղի է ունենալու Հայաստան-Սփյուռք վեցերորդ համաժողովը, որի դատին Հայաստանի իշխանությունը ներկայացնելու է Համահայկական խորհրդի ստեղծման առաջարկը: Ավելորդ է ասել, որ այդ գաղափարի տակ այսպես ասած համահայկական ներուժի ավելի արդյունավետ օգտագործելու նպատակադրումն է, ինչպես համահայկական ցանկացած գաղափարի տակ: Այդ գաղափարը լինելու է ներիշխանական պայքարի տարր, որ սկսվել է 2018-ին ընդառաջ՝ երբ Սերժ Սարգսյանը վայր կդնի նախագահական լիազորությունը, և անկասկած շարունակվելու է հետագա տարիներին, երբ իշխանության ներսում ընթանալու է թե' նոր մոդելի, թե' հարաբերությունների նոր տրամաբանության պայմաններում ներիշխանական նոր ստատուս-քվոյի ձևավորում:

Այսօր ՀՅԴ Բյուրոյի ներկայացուցիչ Հրանտ Մարգարյանը հայտարարեց, որ ստեղծվող Համահայկական խորհուրդը որևէ կապ չունի Սերժ Սարգսյանի հետ: Համահայկական խորհրդի իմաստը համահայկական մակարդակով հեղինակության, բարոյականության կենտրոն ձևավորելն է՝  հայ ժողովրդի բոլոր շերտերի մասնակցությամբ: Դա այլ նպատակներ չի հետապնդում՝ հայտարարել է Մարգարյանը: Սակայն ակնհայտ է, որ ՀՅԴ հետ կոալիցիա կազմելու գլխավոր նպատակը Սերժ Սարգսյանի համար արտաքին քաղաքական խնդիրների լուծումն էր: Սփյուռքի հետ Սարգսյանի հարաբերությունները, մեղմ ասած, լարված են հայ-թուրքական արձանագրություններից ի վեր, լարված են՝ մեծապես նաև ՀՅԴ-ի թեթև ձեռքով: Եվ այժմ Դաշնակցությունը փորձում է իր վրա վերցնել Համահայկական խորհրդի ձևավորումը, դրանով իսկ բարձրացնելով սփյուռքում Սերժ Սարգսյանի հեղինակությունը: Չի բացառվում, որ հենց Համահայկական խորհուրդը կդառնա այն համազգային պլատֆորմը, որի միջոցով էլ Նախագահին համազգային խնդրանք-պահանջ կներկայացնեն՝ 2018-ին զբաղեցնել վարչապետի պաշտոնը:

Ստելլա Խաչատրյան