Սահմանամերձ զորամասերում ծառայող երևանաբնակ զինծառայողների ծնողները կայցելեն իրենց զավակներին

Երևանի քաղաքապետարանում կայացած աշխատանքային խորհրդակցության ժամանակ քաղաքապետ Տարոն Մարգարյանը քաղաքապետի գլխավոր խորհրդական Վանո Վարդանյանին, աշխատակազմի համապատասխան ստորաբաժանումներին և վարչական շրջանների ղեկավարներին հանձնարարել է նախապատրաստական աշխատանքներ տանել «Էրեբունի-Երևան 2799» միջոցառումների ծրագրի շրջանակում սահմանամերձ զորամասերում ծառայող երևանաբնակ ժամկետային զինծառայողների ծնողների հերթական այցելությունը հոկտեմբերի 28-ին կազմակերպելու ուղղությամբ: Այս մասին տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից:

«Արդեն 5 տարի է, ինչ բարի ավանդույթ ենք դարձրել տարին առնվազն երկու անգամ սահմանամերձ զորամասերում ծառայող երևանաբնակ զինծառայողների ծնողների զորամասեր այցելությունների կազմակերպումը:

Ըստ այդմ, սերտորեն համագործակցելով ՀՀ պաշտպանության նախարարության և Արցախի պաշտպանության բանակի հետ, պատշաճ նախապատրաստվեք հոկտեմբերի 28-ին հերթական այցի կազմակերպմանը։

Հատուկ ուշադրություն դարձրեք, որպեսզի իրենց զինվոր որդիներին այցելելու և տեսակցելու ցանկություն ունեցող բոլոր ծնողներն ընդգրկվեն ծրագրում», - ընդգծել է քաղաքապետ Տարոն Մարգարյանը:

Հարկ է նշել, որ 2013թ.-ից մեկնարկած սոցիալական կարևոր նշանակություն ունեցող այս ծրագրի շնորհիվ իրենց զավակներին այցելելու ու տեղերում նրանց ծառայության պայմաններին ծանոթանալու հնարավորություն այս տարիների ընթացքում ունեցել է երևանաբնակ զինծառայողների ավելի քան 9000 ծնող, որից շուրջ 1700-ը՝ այս տարվա ապրիլին կազմակերպված համանման այցելության շրջանակում: