Չախալյանի գործը բացառիկ է. Ֆերնան դը Վարեն

«Արդար դատավարության մասին խոսելիս սովորաբար յոթ հիմնական ասպեկտ նկատի ունենք, և Չախալյանի գործում միաժամանակ խախտվել են դրանցից չորսը։ Սա իմ ուսումնասիրած դեպքերի մեջ բացառիկ է, քանի որ Եվրոպական դատարան դիմելիս սովորաբար մեկ կամ երկու խախտման դեմ են բողոքում»,- այսօր լրագրողներին ասաց մարդու իրավունքների գծով միջազգային փորձագետ Ֆերնան դը Վարենը, ով «Ազգային փոքրամասնություն լինելու վտանգները. Մարդու իրավունքները և Չախալյանն ընդդեմ Վրաստանի» զեկույցի հեղինակն է։

Չախալյանի՝ արդար դատավարություն ունենալու իրավունքը խախտվել է հետևյալ կետերով՝ մեղադրյալի՝ ինքն իրեն պաշտպանելու իրավունք, վկաներին հարցաքննելու իրավունք, իրավական խորհրդատվության իրավունք և թարգմանության իրավունք։

«Վրաստանը որոշակի պարտավորություններ ունի. Կան կանոններ, որոնց նա պետք է հետևի, այդ թվում՝ արդար դատավարություն ապահովելու հարցում։ Իմ ուսումնասիրած գործերի հետ համեմատելով՝ կարող եմ ասել, որ մեծ է հավանականությունը, որ Մարդու իրավունքների եվրոպական դատարանը, ուր այժմ գտնվում է Չախալյանի գործը, կորոշի, որ Վրաստանը խախտել է մարդու իրավունքները։ Այս դեպքում մենք գործ ունենք բացառիկ գործի հետ նաև այն պատճառով, որ տվյալ դեպքում առկա է նաև նրա՝ ազգային փոքրամասնության ներկայացուցիչ լինելու հանգամանքը»,- ասաց փորձագետը։

Ի պաշտպանություն Չախալյանի հանդես են եկել բազմաթիվ կազմակերպություններ, Վրաստանի Մարդու իրավունքների պաշտպանը և Վրաստանում գործող տարբեր հասարակական կազմակերպություններ։ Սակայն դա փորձագետը բավարար չի համարում։

«Հիմա պետք է հարցը բարձրացնել ավելի բարձր ատյաններում։ Բայց սա շատ երկար գործընթաց է. տարիներ են պետք, որ որոշում ընդունվի»,-ասաց Վարենը՝ ավելացնելով, որ Եվրոպական դատարանը կարող է միայն ֆինանսական փոխհատուցում տրամադրելու որոշում կայացնել, սակայն չի կարող այս պահին ազդել Չախալյանի հանդեպ կայացված դատավճռի վրա։