Հարսին խոշտանգած կնոջ բարեկամները ցույցի էին դուրս եկել

Այսօր Արտաշատի դատարանի դիմաց, ուր անցկացվում էր Մարիամ Գևորգյանի գործով դատավարությունը, բողոքի ակցիա էին անում մեղադրյալի հարսներին՝ Մարիամ Գևորգյանին և Մելինե Բայաթյանին խոշտանգումների ենթարկած Հայկանուշ Միքայելյանի հարևաններն ու բարեկամները։

Նույն պահին դատարանի առջև ցույց էր անցկացնում Մարիամ Գևորգյանին գործի ողջ ընթացքում սատարող «Ընդդեմ կանանց հանդեպ բռնության» կոալիցիան, որը պահանջում էր գործի համար բաց դատավարություն: 

Երկու խմբի ցուցարարների միջև տեղի է ունեցել ընդհարում։ «Ազատություն անմեղ կնոջը», «Զրպարտիչ-շանտաժիստներ» և նմանատիպ պաստառներով հակընդդեմ ակցիա անողները, իրավապաշտպան Դանիելյանի փոխանցմամբ, Հայկանուշի բարեկամներն ու հարևաններն էին, ովքեր վստահեցնում էին, որ լավ են ճանաչում նրան, և կինն ունակ չէ մարդ ծեծելու: Դատարանի մոտ ներկա Հելսինկյան ասոցիացիայի ներկայացուցիչ Արման Վեզիրյանի փոխանցմամբ՝ հակընդդեմ բողոքի մասնակիցները ցուցադրել են Մարիամի ծեծված մարմնի նկարներ և ասել, թե նա մաշկային անբուժելի հիվանդություն է ունեցել, այդ պատճառով է Զիրոյանը բաժանվել է նրանից: Հայկանուշ Միքայելյանի մտերիմները հեգնել և վիրավորական արտահայտություններ են արել Մարիամ Գևորգյանի հասցեին և ասել, որ նրան պետք է դատել սուտ մատնության համար։

Դատավորն անփոփոխ է թողել փակ դատավարություն անցկացնելու մասին Դավիթ Զիրոյանի առաջին կնոջ՝ Մելինե Բայաթյանի միջնորդությունը։

Հիշեցնենք, որ Մարիամ Գևորգյանը բողոք էր ներկայացրել ամուսնու՝ Դավիթ Զիրոյանի դեմ, ով Սանկտ-Պետերբուրգում մոտ 10 ամիս մոր՝ Հայկանուշ Միքայելյանի հետ խոշտանգումների և ծեծի էր ենթարկել կնոջը։ Զիրոյանին մեղադրանք է առաջադրվել «Դիտավորությամբ ուրիշի առողջությանը միջին ծանրության վնաս պատճառելու» և «Ծեծ» հոդվածներով, որի համաձայն նրան կարող էին դատապարտել մինչև 3 տարվա ազատազրկման: Դատարանի որոշմամբ՝ Զիրոյանն ազատ է արձակվել Հայաստանի Հանրապետության 20-ամյակի կապակցությամբ ՀՀ նախագահի կողմից հայտարարված համաներմամբ: Հայկանուշ Միքայելյանի դեմ առաջադրվել է մեղադրանք քրեական օրենսգրքի 113 (միջին ծանրության վնասվածնքեր հասցնել) և 119 (խոշտանգում) հոդվածներով: