Պարուհի Մագայի ոչ սթափ վարորդը կալանավորված է

Երևանի Կենտրոն Նորք-Մարաշ վարչական շրջանի ընդհանուր իրավասության դատարանը հունիսի 14-ին բավարարել է քննչական մարմնի միջնորդությունը Ռոման Հակոբյանի նկատմամբ կիրառել երկամսյա խափանման միջոց՝ կալանք:

Հիշեցնենք, որ Երևանում հունիսի 13-ին, գիշերը ժամը 01.55-ին 29-ամյա Ռոման Հակոբյանը, վարելով BMW մակնիշի ավտոմեքենան, Խանջյան փողոցում դուրս է եկել երթևեկելի գոտուց և բախվել էլեկտրասյանը, ինչի հետևանքով մեկ մարդ մահացել է, իսկ 3-ը՝ տարբեր աստիճանի մարմնական վնասվածքներով տեղափոխվել հիվանդանոց:

Գրիգոր Լուսավորիչ բժշկական կենտրոնից տեղեկացրել էին, որ Մարիամ Գևորգյանը մահացել է, իսկ Շամիրամ Գրիգորյանի վիճակը ծանր կայուն է: Շամիրամ Գրիգորյանը հայտնել է, որ իրենք պարուհիներ են, իսկ մահացածը պարուհի Մագան է:

ԱԻՆ լրատվական ծառայությունից էլ տեղեկացրել էին. որ հունիսի 13-ին, ժամը 01.55-ին ոստիկանությունից տեղեկություն էր ստացվել, որ Երևանի Խանջյան և Չայկովսկի փողոցների խաչմերուկի մոտ տեղի է ունեցել ավտոպատահար, կան տուժածներ: Դեպքի վայր էր մեկնել մեկ մարտական հաշվարկ: Պարզվել է, որ BMW մակնիշի 33 LD 321 համարանիշի ավտոմեքենան (վարորդ՝ 29-ամյա Ռ. Հակոբյան) դուրս էր եկել ճանապարհի երթևեկելի հատվածից, մխրճվել «Զեբրա» բացօթյա սրճարանի տարածք և բախվել սյանը: