«Նատալի Ֆարմ» ընկերությանը 50 մլն դրամով տուգանելը Եվրախորհրդի աչքին թոզ փչելու համար էր. գործարար

«Նատալի Ֆարմ» ընկերությանը 50 մլն դրամով տուգանելը պետք էր Եվրամիության աչքերը կապելու համար: Նման կարծիք Լուրեր.com-ի հետ զրույցում հայտնեց «Սզնի» ՍՊԸ-ի տնօրեն Գառնիկ Սահակյանը:

Նա նշեց, որ եթե մենք լինեինք իրավական պետության մեջ, ապա 2009-ից սկսած իր կրած զրպարտությունների համար, պետությունը ոչ թե ընկերությանը, այլ միայն իր անձին պետք է հատուցեր այդքան գումար՝ կրած բարոյական զրկանքների համար։

«Այդ 50 մլն-ը Եվրախորհրդի աչքին թոզ փչելու համար էր: Բայց թե իրենք իրենց մեջ ինչքան են տվել-վերցրել, վերևում Աստված գիտի, ներքևում՝ պետական կառույցերը: Դրանք մի քանի տասնյակ անգամ ավելի սուբյեկտիվ են եղել, դա իմ անձնական կարծիքն է: Դա մեր իրականության ողբերգությունն է»,- ասաց նա:

Սահակյանը նշեց, որ մեր տնտեսական մրցակցության պաշտպանության պետական հանձնաժողովը պայքարում է ազատ տնտեսական դաշտի համար, բայց դա բավարար մեխանիզմը չէ տնտեսական դաշտն ազատականացնելու համար:

«Սզնի» ՍՊԸ-ի տնօրենը նշեց, որ պատրաստ է իր իրավունքները պաշտպանել, պայքարել մինչև վերջ, սակայն դատական ծախսերը հոգալու համար գումար չունի:

«Եթե հնարավորություն ունենամ, մինչև Եվրադատարան այս գործը կհասցնեմ, սակայն լուրջ գումարներ են պետք։ Եթե գտնվի մի ընկերություն, որ իր վրա կվերցնի ծախսերն ու իրավաբանական օգնությունը, ապա ես պատրաստ եմ մինչև Եվոպական դատարան տանել այս գործը»,- ասաց Սահակյանը:

Հիշեցնենք, որ հունիսի 11-ին ԱԺ պատգամավոր Սամվել Ալեքսանյանին պատկանող «Նատալի ֆարմ» ընկերությունը տուգանվեց 50 մլն դրամով: ՀՀ տնտեսական մրցակցության պաշտպանության պետական հանձնաժողովն հրապարակեց դեղերի պետական գնումների ոլորտում հարուցված վարչական վարույթի արդյունքները:

ՏՄՊՊՀ փորձագետները, ներկայացնելով ուսումնասիրության արդյունքները, նշեցին, որ դեղերի պետական գնումների համակարգում իրոք տեղ են գտել մի շարք իրավախախտումներ, որոնք էլ իրենց հերթին ազդեցություն են թողել մրցակցային դաշտի վրա: «Նատալի ֆարմի» վարքագիծը հակամրցակցային է դիտվել 8 մրցույթներում: Մասնավորապես՝ մրցույթից առաջ կամ հետո «Նատալի ֆարմը» կատարել է «ցեֆտրիաքսոն» դեղատեսակի նվիրատվություն, կամ այն մրցույթներում, որտեղ հայտ է ներկայացրել «Սզնի» ընկերությունը, կատարվել է ինքնարժեքից ցածր գնով առաջարկ: Այսինքն՝ դեղ է ներմուծել 207 դրամով, սակայն մրցույթին ներկայացրել է շատ ցածր գին՝ «Սզնի» ընկերությանը դուրս մղելու համար:

Փորձագետները նշել են, որ «Նատալի ֆարմը» դեղերի ներկրման և իրացման ոլորտում ամենախոշոր ընկերությունն է և գրանցված է որպես գերիշխող դիրք գրավող: Ընկերությանը տուգանեցին 50 մլն դրամի չափով, այլևս նման գործողություններ թույլ չտալու պայմանով:

Հիշեցնենք, որ ՀՀ տնտեսական մրցակցության պաշտպանության պետական հանձնաժողովը բողոք դիմումը ստացել էր «Ժառանգություն» Կուսակցության ներկայացուցիչներ Ա. Բախշյանից և Ս. Սաֆարյանից: Ըստ բողոքի՝ դեղերի գծով պետական գնումների ոլորտում հակամրցակցային գործողություններ են իրականացվում, որոնց արդյունքում դեղերի ներկրմամբ զբաղվող «Սզնի» ընկերության համար շուկայում ստեղծվում են մուտքի խոչընդոտներ: