Դանակի հարվածներից ստացած վնասվածքներով օպերլիազորները՝ վերակենդանացման բաժնում

Այսօր՝ հունիսի 16-ին՝ ժամը 21:20-ի սահմաններում, Երևանի Պռոշյան փողոցում գտնվող թիվ 3 հիվանդանոցի վերակենդանացման բաժանմունք են տեղափոխվել 2 երիտասարդ: Ինչպես հիվանդանոցից Tert.am-ին հայտնում է ֆոտոլրագրող Գագիկ Շամշյանը, նշված երիտասարդները Ոստիկանության Երևան քաղաքի վարչության, Ոստիկանության կենտրոնական բաժնի քրեական հետախուզության բաժանմունքի օպերլիազորներ 22-ամյա Հայկ Դանիելյանն ու 31-ամյա Արթուր Մխիթարյանն են:

Հիվանդանոցում բժիշկները ֆոտոլրագրողին հայտնել են, որ Արթուրը սուր կտրող ծակող գործիքի հարվածից ստացել է 3 վնասվածք, իսկ Հայկը՝ 1:

Գ. Շամշյանը հայտնում է, որ այս պահին Հայկը տեղափոխվեց հիվանդասենյակ, իսկ Արթուրը գտնվում է վերակենդանացման բաժանմունքում, որտեղ բժիշկները վիրահատում են վնասված հատվածը:

Ըստ Շամշյանի՝ այսօր երեկոյան Ոստիկանության Կենտրոնական բաժնի քրեական հետախուզության բաժանմունքի աշխատակիցները ծառայություն կատարելիս են եղել Մաշտոցի պողոտայի և Պուշկինի փողոցի խաչմերուկում: Այդ ժամանակ լսել են հայհոյանքներ և նկատել, որ նշված խաչմերուկում 2 երիտասարդ ծեծի են ենթարկում մեկ այլ երիտասարդի: Դեպքի վայրում հավաքված քաղաքացիները ֆոտոլրագրողին պատմել են. «3 երիտասարդ վիճում էին և հայհոյում իրար, մեկ էլ էն տեսնենք, որ 3-4 ջահելներ շտապ մոտեցան կռիվ անողներին, գոռալով թե իրենք քրեական հետախուզության աշխատողներ են: Կռիվ անողները դիմեցին փախուստի տարբեր ուղղություններով: Նրանց սկսեցին հետապնդել քրեականի աշխատող ներկայացած երիտասարդները»:

Այնուամենայնիվ, քրեական հետախուզության աշխատակիցներին հաջողվում է բռնել նրանցից մեկին՝ 21-ամյա Արամ Առաքելյանին և, մինչ կփորձեին նրան տեղափոխել Ոստիկանություն, նրա ընկերը՝ 22-ամյա Վլադիմիր Խոդիկյանը, իր մոտ եղած դանակով հարվածներ է հասցնում ոստիկանության աշխատակիցներին և դիմում փախուստի, սակայն մյուս ոստիկաններին հաջողվում է բռնել նաև նրան:

Այս պահին Ոստիկանության Կենտրոնական բաժին են տեղափոխվել Վ. Խոդիկյանն ու Ա. Առաքելյանը, ովքեր Արտաշատ քաղաքի բնակիչներ են, ինչպես նաև այն քաղաքացին, ում ծեծի էին ենթարկում: Այդ քաղաքացին Երևան քաղաքի Սարի Թաղի 2-րդ փողոցի բնակիչ՝ 23-ամյա Տիգրան Փիլոյանն է:

Շամշյանը հայտնում է, որ հիվանդանոց են ժամանել Ոստիկանության Երևան քաղաքի վարչության պետ, գեներալ-մայոր Ներսես Նազարյանը, Երևանի ոստիկանապետի օպերգծով տեղակալ, Ոստիկանության գնդապետ Աշոտ Միրիջանյանը և Ոստիկանության կենտրոնական բաժնի պետ, ոստիկանության գնդապետ Սարգիս Մարտիրոսյանը:

Ֆոտոլրագրողը հայտնում է, որ իր տեղեկություններով, փաստի առթիվ ոստիկանության քննչական գլխավոր վարչության կենտրոնական քննչական բաժնում կհարուցվի քրեական գործ՝ ՀՀ Քր. Օր.-ի 316 հոդվածի (իշխանության ներկայացուցչի նկատմամբ բռնություն գործադրելը) հատկանիշներով:

Ըստ Շամշյանի՝ նրանց մոտ հայտնաբերվել է նաև թմրամիջոց, ինչպես նաև հանցագործության գործիք 2 դանակները, որոնք գաղտնի փականով են:

Բժիշկները հայտնել են, որ դեռ 10 օրից ավել վիրավորները պետք է մնան իրենց հսկողության տակ:

Լուսանկարը՝ Գագիկ Շամշյանի։

Tert.am