Այս գործի արդարացի լուծումն ակնկալում եմ մեր պետությունից. փաստաբան

Երեկ փաստաբանների միության պալատում տեղի ունեցավ Ռոմիկ Ռաֆիկի Մաթևոսյանի փաստաբան Սարգիս Ասլանյանի ասուլիսը։ Նշենք, որ ամբաստանյալ Ռոմիկ Ռաֆիկի Մաթևոսյանին մեղավոր են ճանաչել պետական դավաճանության մեջ և դատապարտել 10 տարի ազատազրկման։ Հիշեցնենք, որ նա, 2008 թվականից բնակվելով Թուրքիայում, կապ է պահպանել Թուրքիայի տարածքում գործող ադրբեջանական հատուկ ծառայությունների հետ կապ ունենալու մեջ կասկածվող ոմն Տիգրանի և Սայիդի հետ և ռազմական տեղեկություններ տրամադրել վերջիններիս։

Փաստաբան Սարգիս Ասլանյանը ներկայացրեց գործի մանրամասները՝ նշելով, որ իր պաշտպանյալին մեղադրել են ոչ բավարար հիմքերով։ Նրա պնդմամբ գործում չկան բավարար ապացույցներ, դրա համար էլ իրենք դիմել են վերաքննիչ դատարան։

Խոսելով դատավճռի մասին՝ Սարգիս Ասլանյանը նշեց. «Ես նման խայտառակ դատավճիռ դեռ չեմ տեսել։ Այստեղ ակնհայտ է, որ կատարվում է պատվեր ու ես 100 տոկոս համոզված եմ»։ Լուրեր.com-ի հարցին, թե ո՞վ է պատվիրատուն, Սարգիս Ասլանյանը պատասխանեց. «Ասում եմ պետությունը, Ազգային անվտանգության ծառայության, գլխավոր դատախազության և հիմա էլ արդեն դատարանի հետ»։

Իսկ այն հարցին, թե ինչո՞ւ է պետությունը պատվեր կատարում, Սարգիս Ասլանյանը պատասխանեց. «Որպեսզի գլխաքանակ ապահովի, որն ավելի հավանական է։ Կամ էլ իրենց թույլ տված սխալը չընդունելը, ու եթե ապացուցվի նրանց սխալը, ապա քննիչի համար էլ, դատախազի համար էլ, շատ տխուր կլինի»։

Լուրեր.com-ի այն հարցին, եթե վերաքննիչ դատարանում էլ չարդարանան իրենց սպասելիքները, ի՞նչ են անելու, Սարգիս Ասլանյանը պատասխանեց, որ իրենք կդիմեն Եվրադատարան։ Միաժամանակ հույս հայտնեց, որ այս հարցը կլուծվի Հայաստանում։ Ասելով, որ այս խնդիրը ոչ միայն Ռոմիկ Մաթևոսյանինն ու իր պաշտպանինն է, այլ նաև յուրաքանչյուրինը։

Նրա խոսքերով՝ այսօր յուրաքանչյուր մարդ, ով կարող է կապ ունենալ Թուքիայի հետ, հնարավոր է վաղ, թե ուշ, կանգնի այս փաստի առաջ՝ հավելելով. «Այս գործի արդարացի լուծումն ակնկալում եմ մեր պետությունից»։

Նշենք նաև, որ այս գործում ներգրավված անձանց փաստաբանները նույնպես դիմել են վերաքննիչ դատարան։ Դատը կկայանա հունիսի 20-ին՝ ժամը 12.00-ին։