Վիկ Դարչինյանը Հայաստանում պրոմոուտերական ընկերություն կբացի

Բռնցքամարտիկ Վիկ Դարչինյանը Հայաստանում պրոմոուտերական ընկերություն կբացի: Այս մասին մարզիկն այսօր հայտնեց լրագրողների հետ հանդիպմանը:

Դարչինյանի խոսքով՝ ինքը ցանկանում է հնարավրություն տալ հայ մարզիկներին՝ ուժերը փորձելու պրոֆեսիոնալ ռինգում:  Բռնցքամարտիկը Հայաստան է ժամանել ոչ միայն հանգստանալու, այլև մարզիների պարապմունքները դիտելու:

«Շատ բռնցքամարտիկներ ունենք, ովքեր կարող են պրոֆեսիոնալ բռնցքամարտում  հաջողության հասնել: Հնարավորություն կտամ նրանց,  որ փորձեն իրենց ուժերը: Շուտով կբացեմ պրոմոուտերական ընկերություն: Ես նրանց հնարավորություն կտամ ԱՄՆ-ում սպարինգներ անցկացնել: Ցանկանում եմ օգտակար լինել մեր հայ երեխաներին»,-ասաց բռնցքամարտիկը:

Դարչինյանը հավելեց, որ պատրաստ է  մարզել բռնցքամարտիկներին, սակայն նրանց հետ մշտական աշխատանքը մեծ պատասխանատվություն է, այդ պատճառով էլ հատուկ մարզիչներ կհրավիրի մարզիկների հետ աշխատելու համար:

Պրոմոուտերական ընկերության բացման աշխատանքները բռնցքամարտիկը կսկսի առաջիկա մենամարտի մասին վերջնական որոշում կայացնելուց հետո: