Կոլապսը սկսված է․ աջ ղեկով մեքենաներ ներկրողները չեն հասցրել մաքսազերծել

Աջակողմյան ղեկով ավտոմեքենաներ ներկրողները դժգոհում են՝ օրենքի փոփոխությունից հետո կանգնել են փաստի առաջ։ Պարզվում է՝ ովքեր չեն հասցրել մեքենաները մաքսազերծել մինչև նախորդ տարվա դեկտեմբերի 31-ը, ստիպված են մի քանի անգամ ավել գումար վճարել մաքսազերծման համար։

ԼՈՒՐԵՐ․com-ի հետ զրույցում ավտոներկրողներից մեկը (չցանկացավ ներկայանալ) պատմեց, որ ինչպես ինքը, այնպես էլ մի շարք ավտոներկրողներ, սահմանված ժամկետում ներկրել են մեքենաները, սակայն տարեվերջյան օրերին բրոքերները, որոնք զբաղվում են միջնորդությամբ ու փաստաթղթաբանությամբ, հրաժարվել են զբաղվել նրանց ավտոմեքենաներով՝ պատճառաբանելով, որ ծանրաբեռնված են և այլևս ժամանակ չունեն հավելյալ պատվերների համար․ «Ստացվում է՝ ավտոմեքենաները չհասցրինք նախորդ տարվա մեջ մաքսազերծել հին գնով ու հիմա իմ 55 ավտոմեքենան մնաց օդի մեջ։ Մինչև դեկտեմբերի 31-ը մեքենաները եղել են մաքսատան տարածքում, ես ունեմ դա փաստող բոլոր փաստաթղթերը։ Խնդրի առաջ կանգնել եմ ոչ միայն ես, այլև բազմաթիվ ներկրողներ, ընդհանուր մեքենաների թիվը հասնում է 1000-ի։ Մեր պահանջն է, որպեսզի այս մեքենաների մաքսազերծումն իրականացվի նախկին գնով, ոչ թե 5-6 անգամ ավել բարձր արժեքով, քանի որ մեղքը ոչ թե մերն է, այլ բրոքերներինը, որոնք ծանրաբեռնվածության պատճառով չեն կարողացել աշխատել մեզ հետ»,- նշեց ավտոներկրողը։

Մեր զրուցակցի խոսքով՝ եթե նախկինում մաքսազերծում իրականացնելիս՝ մեքենայի գնված արժեքին համարժեք գումար էին վճարում, ապա հիմա՝ ըստ պետական դրույքաչափերի․ «Եթե նախկինում կարող էի 500 դոլար վճարել, ապա հիմա՝ 7000 դոլար մեկ մեքենայի համար։ Դե պատկերացրեք՝ ինչ թիվ  է կազմելու, 55 մեքենայի դեպքում որքան ահռելի վնաս եմ կրելու»,- ասաց նա։

Հիշեցնենք, որ ՊԵԿ-ը հայտարարել էր, որ այսուհետև հնարավոր է Հայաստան ներմուծել  աջ ղեկով տրանսպորտային միջոցներ՝ միայն դրանց ղեկային տեղաբաշխումը փոխելու պայմանով: Ավելի ուշ՝ 2019 թվականի դեկտեմբերի 30-ին հաղորդագրություն տարածվեց, որ, եթե հայտարարատուն ավտոմեքենայի համար հաշվարկված վճարումների և բացթողնման հետ կապված մաքսային գործառնությունների կատարման համար կներկայանա 2020թ-ի հունվարի 1-ից հետո, ապա տվյալ ավտոմեքենայի մաքսային վճարները կհաշվարկվեն 2020թ-ի հունվարի 1-ից գործող դրույքաչափերով:

Թեև ՊԵԿ-ը հորդորում էր բոլոր այն քաղաքացիներին, ովքեր արդեն իսկ իրականացրել են ներմուծվող ավտոմեքենաների հայտարարագրման հետ կապված գործառնությունները, մինչև ընթացիկ տարվա վերջ կատարել նաև հաշվարկված մաքսային վճարումները, ներկայանալ մաքսատուն՝ բացթողնման հետ կապված մաքսային գործառնությունները ավարտելու, և ավտոմեքենան ԱՏԳ տարածքից դուրս բերելու համար, սակայն ինչպես մեր զրուցակիցն է պնդում՝ իրենք խնդրի մեջ են հայտնվել անկախ իրենց կամքից՝ բրոքերների ծանրաբեռնվածության հետևանքով։