Այդ տվյալային հրապարակումն ուղղակի ժամանակավրեպ էր․ տնտեսագետը՝ IMF-ի հաշվետվության մասին

Հունվարի 6-ին ՀՀ վարչապետ Նիկոլ Փաշինյանի ֆեյսբուքյան էջում կատարած հայտարարությունը, Հայաստանից բացի, մեծ արձագանք ունեցավ նաև հարևան Վրաստանում: Խոսքը վերաբերում է Հայաստանում 1 շնչին ընկնող ՀՆԱ-ի ցուցանիշին, որի համաձայն, ըստ Փաշինյանի, Հայաստանն առաջ է անցել Վրաստանից, իսկ 2020 թվականին առաջ կանցնի Ադրբեջանից:

Հայ հասարակությունն ուրախացավ՝ մտածելով, որ հենց այս թվերից է կախված իր տնտեսական վիճակը, իսկ հարևան Վրաստանում անհանգստացան՝ հետ են մնացել Հայաստանից: Վրացական կողմից  Փաշինյաննի այս հայտարարությանն անդրադարձավ  երրորդ նախագահ Միխեիլ Սաակաշվիլին՝ մասնավորապես նշելով, որ նման բան տեղի չի ունեցել ո՛չ իր կառավարման տարիներին, ո՛չ նույնիսկ Շևարդնաձեի, տեղի չի ունեցել Տիգրան Մեծի՝ Հայաստանի մեծ կառավարչից հետո: Չկա ոչ մի պատճառ աշխարհագրական դիրքի առումով, միջոցների առումով, թե ինչու պետք է Հայաստանի բնակիչը ավելի շատ եկամուտ ունենա, քան վրացին:

Կողմերից ով ու որքան պետք է ուրախանա՝ ԼՈՒՐԵՐ.com-ի թղթակիցը փորձեց պարզել տնտեսագետ Սուրեն Պարսյանից:

«IMF-ի հրապարակած այդ հաշվետվությունը նախնական էր և հաշվի չէր առնվել դեկտեմբեր ամսվա իրական տվյալները, այլ օգտագործել էիր կանխատեսելի տվյալները: Բացի սա, Վրաստանի դեպքում՝ հաշվի չէր առնվել նոր մեթոդաբանությունը, ըստ որի՝ մեկ շնչին բաժին հասնող ՀՆԱ-ն ավելացվեր 7տոկոսով»,- ասաց տնտեսագետը: 

Պարսյանի խոսքով, եթե հաշվելիս Վրաստանի նկատմամբ կիրառեին այդ 7 տոկոսը, ապա Հայաստանից ավելի բարձր ցուցանիշ կունենային մեր հարևանները:

«Կարծում եմ՝ այդ տվյալային հրապարակումն ուղղակի ժամանակավրեպ էր, չարժեր շտապել արդյունքների հրապարակման հարցում: Պետք էր ընդհանուր տվյալները ստանալ, ամփոփել, գնահատել ու նոր նման հայտարարություներ անել»,-ընդգծեց նա:

Տնտեսագետը նշեց նաև, որ այդ ցուցանիշները այնքան էլ էական չեն, քանի որ որևէ ներդրող ուշադրություն չի դարձնում, թե տվյալ երկրում մեկ շնչին ընկնող ՀՆԱ-ն որքան է.«Ներդրողի համար ավելի կարևոր է գնողունակությունը: Օրինակ՝ 100 դոլարով որքան ապրանք և ծառայություն է հնարավոր ձեռք բերել Հայաստանում և Վրաստանում:  Սա է լուրջ խնդիրը: Եվ այս պահի դրությամբ Վրաստանում ավելի շատ ապրանք ու ծառայություն կարող ես ունենալ, քան մեզ մոտ»:

Նա նաև նշեց, որ հրապարակված ցուցանիշները դեռ թարմացվելու են, քանի որ ցուցանիշները ընդամենը նախնական կանխատեսում էր: