Եղեգնուտցիները բահերով ու եղաններով ցույց են անցկացնում (տեսանյութ)

Ժամեր առաջ  Արմավիրի մարզի Եղեգնուտ համայնքում լարված իրավիճակ էր. եղեգնուտցիները բահերով ու եղաններով բողոքի ակցիա էին իրականացնում՝ ընդդեմ նախկին համայնքապետ Ռազմիկ Մարգարյանի: Վերաքննիչ դատարանը որոշում է կայացրել, ըստ որի՝ նախկին համայնքապետը պետք է վերականգնվի իր պաշտոնում, իսկ գյուղացիները չեն ցանկանում:

Հեղափոխությունից հետո բողոքի ակցիաների միջոցով բնակիչները ստիպել են Ռազմիկ Մարգարյանին  հրաժարական տալ՝ 2018-ի հուլիսի 2-ին:  Վերջինս հրաժարականի դիմում է  ներկայացրել ավագանուն, որից հետո, ըստ կարգի, ավագանին պետք է արձանագրեր այդ հրաժարականը, որպեսզի Մարգարյանը պաշտոնապես ազատված համարվեր։ Սակայն ավագանին այդպես էլ չի արձանագրել։ 

Այդ ժամանակ գործող մարզպետ Գագիկ Միրիջանյանը որոշում է կայացրել Մարգարյանի փոխարեն համայնքապետի պաշտոնակատար նշանակել Ռազմիկ Մկրտչյանին։

«Հանուն ժողովրդի բարեկեցության» մարդասիրական և տնտեսական զարգացման ՀԿ նախագահ Այսեր Իսայանը ԼՈՒՐԵՐ.com-ի հետ զրույցում հավաստեց, որ ավագանին Ռազմիկ Մարգարյանի բարեկամն է, և դա է պատճառը, որ մինչ օրս չի ստորագրել. «Ավագանին իրեն ասում է՝ մնա՛, Մարգարյանն ասում է՝ չէ, գնում եմ, բայց դիմումը հետ չի վերցնում: Երբ իր հրաժարականը օրենքի ուժ ստացավ և նշանակվեց համայքի ղեկավարի  ժամանակավոր պաշտոնակատար, նոր միայն դիմել է դատարան»:

Իսայանը կարծում է, որ դա կապված է նախկինների՝ իրեն տված խոստումների հետ. «Երևի ասել են՝ «դուխաթափ» մի՛ եղիր, մենք քեզ  կօգնենք: Վերջում՝ օգնեցին, բայց համայքն արդեն հոգնել է այդ մանկական քմահաճույքներից»:

Իսայանը հստակ ընդգծում է, որ եղեգնուտցիները ինքնաբուխ հավաք են կազմակերպել, որովհետև չեն ցանկանում նախկին, թալանչի ղեկավարի վերադարձը:

ԼՈՒՐԵՐ.com-ի այն հարցին, թե կարող են բնակիչները, կազմակերպելով բողոքի ակցիաներ, իրենց ձայնը լսելի դարձնել և ազդել որոշման վրա, Իսայանը պատասխանեց. «Մենք հավատում ենք մեր կատարած հեղափոխությանը. 2018 թվականին ես մասնիկն եմ եղել այդ հեղափոխության, իմ մեքենայով ճանապարհներ եմ փակել,  մարդիկ եմ բերել քաղաք: Նաև հավատում ենք, որ Հանրապետության համապատասխան մարմինները հաշվի կառնեն ժողովրդի կարծիքը, որովհետև ընտրությանը մասնակցում է  մոտավորապես 863 հոգի, իսկ  մենք 600-ից  ավել ստորագրություն ենք ներկայացնում կառավարությանը, չհաշված ՌԴ-ից ուղարկված հայտարարությունները, որոնցում նշվում է, որ իրենք ևս դեմ են Ռազմիկ Մարգարյանի վերականգնմանը»:

«2019 թվականի սեպտեմբերին տեղի ունեցավ ավագանու ընտրություն․ ավագանու կազմում էին նաև Ռազմիկ Մարգարյանի եղբայրն ու որդին․ վերջիններս մինչ օրս չեն մասնակցել ավագանու նիստերին։ Ամեն ինչ անում են, որպեսզի խափանեն գյուղում կատարվող ցանկացած դրական փոփոխություն։ 4 միլիարդ դրամի յուրացում է եղել.  այդ 4 միլիարդ դրամը բյուջեում ունենալու դեպքում, համայնքը կարող է առանց տոկոս վարկ տրամադրել բնակիչներին՝ գարնանը գյուղատնտեսական աշխատանքները կազմակերպելու նպատակով: Յուրաքանչյուր ընտանիքին՝ 500 հազար դրամ: Սա թեթևացնում էր ժողորդի բեռը:  Մարգարյանը «լափել է» այդքան գումար, հիմա չենք կարող թողնել, որ նա՝  նախկին իշխանության մասնիկը, «լափելով լափի»»,- վերլուծում է Իսայանը:

ՀԿ նախագահի խոսքով՝ վերջին 8 ամիսների ընթացքում համայնքի ղեկավարի ժամանակավոր պաշտոնակատար Ռազմիկ Մկրտչյանը մոտավորապես 150 միլիոն դրամի  ծրագիր է իրականցրել՝ լինելով ընդամենը Ժ/Պ: Մարդիկ հետադարձ հայացք են գցում. կատարված աշխատանքներ՝ 8 ամսում և  թալանված գյուղ՝ 34 տարում: Գյուղացին պարզապես չի կարող տեր չկանգնել իր իրավունքներին:

Իսայանը կարևորում է, որ նախկին համայնքապետից հետո գյուղում մեկը մյուսի թե՛ թաղումներին, թե՛ ուրախություններին մասնակցում են: Գյուղը խաղաղվել է, ջրագիծ են փոխել, միջհամայնքային ճանապարհ են բարեկարգել, խորքային հոր են վերականգնել:

Արփինե Հակոբյան