ՔՊ-ական պաշտոնյաներից ովքե՞ր են «ջրից չոր» դուրս եկել. մաս 4

Ընթերցողի ուշադրությանն ենք ներկայացնում այն ՔՊ-ական պաշտոնյաներին, որոնք, հեղափոխությունից հետո զբաղեցնելով բարձր պետական պաշտոններ, հայտնվել են տարտեսակ սկանդալային պատմություններում, սակայն հաջողացրել են դրանցից չոր դուրս գալ:

Արսեն Թորոսյանի անվան շուրջ կրքերը սկսեցին բորբոքվել այն բանից հետո, երբ նախարարն սկսեց հանրայնորեն գովազդել չարաբաստիկ Գարդասիլ դեղամիջոցը: Կրքերը թեժացան այն բանից հետո, երբ պարզ դարձավ, որ դեղամիջոցի գովազդի համար Թորոսյանի գերատեսչությունը դրամաշնորհ է ստացել: Հաջորդ սկանդալը վերաբերում էր գերատեսչությունում կոռուպցիոն բացահայտումներին, ընդ որում, դա տեղի ունեցավ Թորոսյանի՝ իր ղեկավարած կառույցից կոռուպցիան արմատախիլ անելու հավաստիացումների ֆոնի վրա: 

Թորոսյանը մեկ այլ սկանդալի կիզակետում էլ հայտնվեց՝ կապված պետպատվերի բաշխման հետ: Բանն այն է, որ նախարարի կնոջ ղեկավարած կենտրոնի պետպատվերը, որ մատուցում է միայն МРТ և КТ ծառայություններ, կրկնապատկվել էր: Չցանկանալով որևէ կերպ անդրադառնալ այս հարցին՝ Թորոսյանը հայտնվեց մեկ այլ սկանդալի կենտրոնում՝ փախուստի դիմելով իր իսկ հրավիրած ասուլիսից: Նախարարը նաև աչքի է ընկել իր բազմաթիվ ընկերներին աշխատանքի դասավորելով, իսկ նրանցից մեկին՝ հոգեկան առողջության կենտրոնի պետին, բարձրացված մեծ աղմուկից հետո ստիպված եղավ նույնիսկ հեռացնել զբաղեցրած պաշտոնից: