ՔՊ-ական պաշտոնյաներից ովքե՞ր են «ջրից չոր» դուրս եկել. մաս 5

Շարունակում ենք հանրության ուշադրությանը ներկայացնել ՔՊ-ական ներկա և նախկին այն պաշտոնյաներին, ովքեր, հայտնվելով տարատեսակ  սկանդալային պատմությունների կիզակետում, հաջողել են դրանցից չոր դուրս գալ և չենթարկվել որևէ պատժի:

Այսօր կանդրադառնանք ԲՏԱ նախկին նախարար Հակոբ Արշակյանին: Քանի որ վերջինիս հետ կապված դեպքերը շատ են, անդրադառնանք վերջիններին: Մասնավորապես, բոլորի հիշողության մեջ թարմ է Դուբայի  էքսպոյում Հայաստանի տաղավարի հետ կապված խայտառակ պատմությունը: Նիկոլ Փաշինյանը հայտարարել էր, որ այդ կապակցությամբ նշանակել է ծառայողական քննություն ու դրա արդյունքում պատասխանատուներն ի հայտ կբերվեն ու պատասխանատվության կկանչվեն, եթե պարզվի, որ մեր պաշտոնյաները որևէ անելիքի մեջ թերացել են: Ինչպես երևում է՝ դեռ չեն պարզվել:

Մեկ այլ սկանդալային պատմություն էլ կապված էր այն բանի հետ, որ այն ժամանակ՝ տրանսպորտի նախարար Հակոբ Արշակյանը՝ կառավարության որոշում է անցկացնել տվել, որով պետությունը Համաշխարհային Բանկից 10 միլիոն դոլար պարտք է վերցնում Արշակյանի նախկին գործատուի (National Instruments), նրա սեփական ֆիրմայի (Araxis Engineering) և մի քանի այլ ընկերության հետ Ջրվեժում ինժիներական քաղաք ստեղծելու համար։ Ծախսերի 50 %-ը պետք է կրի պետությունը՝ ՀԲ վարկի հաշվին, իսկ մնացած 50 %-ը` Հակոբ Արշակյանի  նախկին գործատուն, Հակոբ Արշակյանի սեփական ֆիրման և մի քանի այլ ընկերություն: Այն, որ Արշակյանը կապ ունի այդ ընկերությունների հետ, նշվում է նաև նախարարության էջում հրապարակված նախարարի կենսագրության մեջ։ Այն, որ գումարը տրամադրվելու է այդ ընկերություններին, փաստվում է կառավարության պաշտոնական էջում հրապարակված նախագծում։

Վերջին ամենաթարմ սկանդալն էլ, որը չարժանացավ իրավապահների արդարացի գնահատականին՝ կապված էր Հակոբ Արշակյանի կողմից լրագրողին ծեծի ենթարկելու հետ: Իհարկե, նախարարը հետագայում ներողություն խնդրեց և հրաժարական տվեց, սակայն, ակնհայտ է , որ խախտվել է օրենք: Նմանատիպ իրավիճակում կենտրոնի փոխթաղապետին ներկայացվել է մեղադրանք, մինչդեռ Հակոբ Արշակյանը հաջողացրել է ջրից չոր դուրս գալ...