«Պատիվ ունեմ» դաշինքի նախընտրական ցուցակի ուշագրավ դեմքերը. Միհրան Պողոսյան

Շարունակում ենք ընթերցողի ուշադրությանը ներկայացնել արտահերթ խորհրդարանական ընտրություններին մասնակցող ուժերի ցուցակներում տեղ գտած ուշագրավ դեմքերի հետ: Այսօր կանդրադառնանք «Պատիվ ունեմ» դաշինքի թերևս ամենասկանդալային թեկնածուին՝ Միհրան Պողոսյանին:

Սկանդալները վերջինիս ուղեկցել են ինչպես պաշտոնավարման, այնպես էլ ԱԺ պատգամավոր լինելու տարիներին, չեն շրջանցել նաև հեղափոխությունից հետո: Ամենահայտնի միջադեպը, որում հայտնվել է Պողոսյանը, անշուշտ, այսպես կոչված` Օֆշորի գործն է, որը սկզբում կարճվեց, այնուհետև վերաբացվեց, սակայն, նոր իշխանությունները ոչ միայն թույլ տվեցին Պողոսյանին անխափան կերպով հեռանալ Հայաստանից, այլ մի բան էլ ի վիճակի չգտնվեցին ապացուցելու վերջինիս մեղավորությունը: Բացի այդ, նախորդ տարի պարզ դարձավ, որ Պողոսյանի դեմ ՊԵԿ ակտերը հերթով անվավեր են ճանաչվում:

2019-ին Պողոսյանին մեկ այլ մեղադրանք էլ էր առաջադրվել՝ խոշոր չափի փողերի լվացման համար: Պարզվել է՝ Պողոսյանը 1 միլիոն 190 հազար դոլարի աղբյուրը թաքցնելու, խեղաթյուրելու և փողն օրինականացնելու նպատակով այն ձևակերպել է իբրև փոխառություն, փոխանցել «Քեթրին գրուպ»-ին: Ըստ ՀՔԾ-ի՝ Պանամայի օֆշորային գոտում գրանցված Պողոսյանի ընկերության և նրա «Քեթրին Գրուպ»-ի միջև 2015-ին կնքված անտոկոս փոխառության պայմանագրով Պողոսյանի լիազորված անձը 690 հազար դոլար է փոխանցել «Քեթրին գրուպ»-ին: Այս գործով մինչ օրս նույնպես առաջընթաց չկա: Այս ամենը չի խանգարել Պողոսյանին ՝ հեղափոխությունից հետո էլ շարունակել բիզնեսով զբաղվել: Վերջինս հիմնել էր էկզոտիկ մրգերի վաճառքով զբաղվող «Մրգենի» ՍՊԸ-ն:

Իսկ ինչպիսին Է Միհրան Պողոսյանի ֆինանսական դրությունը՝ նախընտրական ցուցակում հայտնվելու պահի դրությամբ: Պողոսյանը հայտարարագրել է 556 միլիոն դրամի և 50 հազար դոլարի եկամուտ: