Ինչո՞ւ մտափոխվեց Դիաննա Գասպարյանը

Օրերս համացանցում էր հայտնվել Էջմիածնի քաղաքապետի ձայնագրությունը, որում վերջինս իր դժգոհությունն էր հայտնում Փաշինյանի վարքագծից և հայտարարում, որ հանուն պետության Փաշինյանը պետք է հեռանա: ԱԺ փոխխոսնակ Ալեն Սիմոնյանը հայտարարել էր, որ այդ ձայնագրությունը արվել է պատերազմի օրերին: Ըստ էության, անցել է բավական երկար ժամանակ , իսկ Գասպարյանը ոչ միայն հրաժարական չի տվել, ոչ միայն չի վերահաստատել հրապարակային կերպով ձայնագրության մեջ հնչեցրած կարծիքը, այլ մի բան էլ այսօր նա ակտիվորեն լծված է ՔՊ-ի քարոզարշավին:

Ինչու՞ մտափոխվեց Էջմիածնի քաղաքապետը: Բանն այն է, որ մտափոխվելու երկու պատճառ կարող էր ունենալ Դիանա Գասպարյանը: Նախ՝ չի բացառվում, որ վերջինս մոռացել է այն վտանգի մասին, որը սպառնում է պետությանը` զուտ այն պատճառով, որ հայտնվել է ՔՊ ցուցակի անցողիկ տեղում: Այսինքն՝ մոռացկոտությունը պայմանավորված է նրանով, որ Գասպարյանին ՔՊ-ում պատգամավորի մանդատ են խոստացել և վերջինս մունջ է եղել, ինչպես կասեր Սուրեն Պապիկյանը:

Չի բացառվում նաև, որ ՔՊ-ում գործի է դրվել կոմպրոմատներով թիմակիցներին սպառնալու և թիմում պահելու մեթոդը: Իսկ ինչ՞ մեղքերի մեջ կարելի էր մեծ ցանկության դեպքում մեղադրել Գասպարյանին: Օրինակ՝ 

Էջմիածնի քաղաքապետ Դիանա Գասպարյանի հաստատած՝ Էջմիածնի քաղաքապետարանի 2020 թվականի գնումների պլանը տնային տնտեսուհու առևտրի ցուցակ էր հիշեցնում։ Մասնավորապես՝ քաղաքապետարանի կարիքների համար Գասպարյանը պատրաստվում է գնել մինչև 3 հազար  փունջ ձնծաղիկ՝ 150 դրամով, 450 հազար դրամի չափով,  17 շիշ «Ֆանտա», 17 շիշ «կոլա», 2800 դրամի տավարի քաբաբ, 9 հազար դրամի շաուրմա, ֆրի, էլի «Կոլա» ու «Ֆանտա» ( այսուհետ՝ «ջրեղեն»), 5 հազարի «բոմբոներկա»,ֆրի, տանձ ու խնձոր, չիր ու չամիչ և այլն։Այնուհետև սկսվում է «ամեն ինչ տան համար» բաժինը․ Զուգարանակոնքի մաքրող միջոց՝ 126 հազար, լվացքի փոշի, մաքրող հեղուկներ, «ավել-սավոկ»  և այլն։ Հետո արդեն գալիս են մեքենաների պահեստամասերը՝ «ռաշիրիտելի կրիշկա», «Զաշիտնիկ» և այլն։

Դիանա Գասպարյանի առևտուրն ամբողջությամբ կազմել է 20 մլն դրամ, մոտ 40 հազար դոլար։ Կարելի՞ էր այստեղ գտնել կոռուպցիոն ռիսկ՝ կարելի էր: Սահմանադրական փոփոխությունների հանրաքվեին ընդառաջ էլ Գասպարյանը ֆեյսբուքյան իր էջով ուղղորդում էր ընտրողներին: Մինչդեռ ընտրական օրենսգրքի 2-րդ հոդվածի 2 կետը հստակ ասում է. «Նախընտրական քարոզչության ընթացքում պետական և համայնքային ծառայողներին, զանգվածային լրատվության միջոցների աշխատակիցներին արգելվում է իրենց վերապահված լիազորությունները գործադրել թեկնածուների, համամասնական ընտրակարգով ընտրություններին մասնակցող կուսակցությունների, կուսակցությունների դաշինքների միջև անհավասար պայմաններ ստեղծելու, կողմնակալություն ցուցաբերելու միջոց»:

Ինչպես տեսնում ենք՝ ցանկության դեպքում ինչպես ասում են՝ բռնվելու տեղ Փաշինյանը կունենար, հետևաբար գուցե հենց այս պատճառով է հայտնի ձայնագրությունից հետո լռել Դիանա Գասպարյանը` մոռանալով պետության և պետականության համար իր սրտացավ կեցվածքը...