Շրջակա միջավայրի նախարարի պաշտոնակատար Ռոմանոս Պետրոսյանը գրությամբ դիմել է ՀՀ գլխավոր դատախազ Արթուր Դավթյանին։ Նախարարի պաշտոնակատարը ներկայացրել է 2021 թվականի ապրիլի 27-ից ապրիլի 29-ը ներառյալ Արարատի մարզի 7 խոշորագույն ձկնաբուծական տնտեսությունում ջրային ռեսուրսների փաստացի վիճակի պահպանության նկատմամբ իրականացված ուսումնասիրությունների վերաբերյալ տեղեկատվություն։ Նախարարության փոխանցմամբ՝ Ռոմանոս Պետրոսյանը խնդրել է գլխավոր դատախազի հանձնարարականը ներկայացված փաստաթղթերն ուսումնասիրելու և համապատասխան ընթացք տալու համար։
Գաղտնիք չէ, որ Արարատի մարզի խոշոր ձկնաբուծարանները պատկանում են նախկին բարձրաստիճան պաշտոնյաներին: Դիցուք՝ Զորակում ձկնաբուծարան ունի Երևանի կայազորային զինվորական հոսպիտալի պետ, բուժծառայության փոխգնդապետ Մհեր Սերոբյանը։
Սիս համայնքն ունի 24 ձկնաբուծարան։ Դրանցից ամենամեծը «Մոս ֆիշն» է, որը պատկանում է ՀՀԿ խմբակցության նախկին պատգամավոր Սամվել Ալեքսանյանի ընտանիքին: Այն կառուցվել էր ինքնակամ՝ առանց համապատասխան փաստաթղթերի և վճարների։ Ալեքսանյանի եղբորորդուն՝ Արտակ Ալեքսանյանին է պատկանում Սիս համայնքի մեկ այլ ձկնաբուծարան, որի սեփականատերն է «Ֆրագարիա» ՍՊԸ-ն։ Արտակ Ալեքսանյանը Երևանի Մալաթիա-Սեբաստիա վարչական շրջանի նախկին ղեկավարն է։
Արարատի մարզի ձկնաբույծներից են նախկին վարչապետ Հովիկ Աբրահամյանի ընտանիքի անդամները։ Հովիկ Աբրահամյանի եղբորը՝ Հենրիկ Աբրահամյանին է պատկանում «Մխչյան ֆիշ» ընկերությունը։ Ընկերությունը ձկնաբուծարաններ ուներ Զորակ և Մխչյան համայնքներում, նաև արտահանող է։ Իրավաբանական անձանց էլեկտրոնային ռեգիստրից տեղեկանում ենք, որ ընկերությունը սնանկության գործընթաց է սկսել։ Հենրիկ Աբրահամյանն իր դստեր՝ Մերի Աբրահամյանի անունով հիմնել էր մեկ այլ ձկնաբուծարան՝ «Մերի ֆիշը»։ Ընկերության բաժնեմասերը, սակայն, անցյալ տարի անցել են Մուշեղ Նիկողոսյանին՝ Արմաշի ալյուրի գործարանի, «Մանանա գրեյնի» սեփականատեր Գուրգեն Նիկողոսյանի որդուն:
Սիփանիկ գյուղում է գտնվում «Ինտեր Ա.Կ.Վ.Ա.» ընկերությանը պատկանող ձկնաբուծարանը, որը ևս գլխավոր դատախազության ուշադրության կենտրոնում է հայտնվել։ Ընկերության 50 տոկոսի բաժնետերը Կարեն Գրիգորյանն է։ Վերջինիս անվանը հանդիպում ենք նաև «Սագատի» ՍՊԸ-ում՝ որպես տնօրեն։ «Սագատի»-ն Հայաստանում ձկնային կերի շուկայի խոշոր խաղացողներից է ու կապվում է Պետեկամուտների կոմիտեի նախագահի նախկին տեղակալ Տիգրան Բարսեղյանի անվան հետ։ «Ինտեր Ա.Կ.Վ.Ա.»-ն Սիփանիկի ամենախոշոր ձկնաբուծարանն է։ Բացի այս ընկերությունից, Տիգրան Բարսեղյանը 50 տոկոս բաժնեմաս ունի «Ջիտիէս ԻՄՄՕ» ընկերությունում, որը շահագործում է Սիփանիկի մեկ այլ ձկնաբուծարան։
Ստացվում է, որ Ռոմանոս Պետրոսյանը և իշխանությունները հերթական անգամ թիրախավորել են նախկին բարձրաստիճան պաշտոնյաներին և գործարարներին և դա անում են անմիջապես ընտրություններից հետո՝ ցույց տալու սեփական էլեկտորատին, որ այսպես կոչված` պողպատե մանդատը արդեն իսկ գործի մեջ է: Ի դեպ, սա վերը նշված անձանց սնանկացնելու առաջին փորձը չէ, 2019-ին քրեական գործեր հարուցվեցին Հովիկ Աբրահամյանի եղբոր դեմ, նույն թվականին Գուրգեն Նիկողոսյանի դեմ, ոստիկանության 6-րդ վարչության 12 աշխատակիցները սկսել էին ստուգումներ իրականցնել վերջինիս գործարանում`նպատակ ունենալով ստուգել հոլդինգի` 2016-2018 թ-ների գործունեությունը: 2020-ին իշխանությունները մեղադրեցին Նիկողոսյանին այն բանում, որ վերջինիս աշխատակիցները մասնակցում են հակակառավարական ցույցերին և պահանջում են Նիկոլ Փաշինյանի հրաժարականը: Իր հերթին` ՊԵԿ նախագահի նախկին տեղակալ Տիգրան Բարսեղյանի որդին էլ վերջին ընտրություններին էր մասնակցում «Հայաստան» դաշինքի ցուցակով: Վենդետա, ինչպես և խոստանում էին իշխանությունները, լինելու է, և, ըստ երևույթին, Ռոմանոս Պետրոսյանը որոշել է սույն վենդետայում ունենալ իր լուման՝ ամեն գնով փորձելով սնանկացնել նախկին բարձրաստիճան պաշտոնյաներին և գործարարներին...
ՈՒՂԻՂ ԵԹԵՐ
Ամենադիտված 
Այնթափի դպրոցը սգում է աշակերտուհու մահը
