Արարատ Գրիգորյանը շարունակում է նախկինների «լավագույն ավանդույթները»

2018թ. հոկտեմբերին Վայոց ձորի մարզպետ նշանակվեց Տրդատ Սարգսյանը, ով պաշտոնավարումից մեկ տարի անց հրաժարական ներկայացրեց: Սարգսյանի հրաժարականի պատճառը հանդիսանում էր սեպտեմբերի 18-ի գիշերը Եղեգնաձոր քաղաքում զինվորականների և մարզպետարանի աշխատակիցների մասնակցությամբ տեղի ունեցած ծեծկռտուքը, որից հետո Տրդատ Սարգսյանի օգնական Հարություն Գրիգորյանը դիտավորությամբ անձին ծանր մարմնական վնաս պատճառելու մեղադրանքով կալանավորվել էր: Տրդատ Սարգսյանի հրաժարականից հետո Վայոց ձորի մարզպետ նշանակվեց փաստաբան Արարատ Գրիգորյանը, ով մինչ այդ զբաղվում էր Վայոց ձորի նախկին մարզպետ Սարգսյանի օգնականի՝ Հարություն Գրիգորյանի պաշտպանությամբ ծեծկռտուքի գործով։ 

Մամուլում այս ընթացքում բազմաթիվ հրապարակումներ եղան, որ մարզպետարանում ստեղծվել են «ֆեյք» հաստիքներ: Մասնավորապես, քաղաքացիներից մեկի պնդմամբ՝ մարզպետարանում ստեղծվել են «ֆեյք» հաստիքներ` իշխանական ուժի ներկայացուցիչների մտերիմներին և «հեղափոխության» իրականացման մեջ իրենց «ավանդը» ներդրած անձանց «տեղավորելու» համար։

«ֆեյք» հաստիքներ բացելուց զատ, մարզպետը լծվել էր նաև հանքաարդյունաբերողների լոբբինգին: Մասնավորապես, Վայոց ձորի մարզպետարանը դատի է տվել Ջերմուկի և Եղեգնաձորի ավագանիներին: Մարզպետարանը ՀՀ վարչական դատարանից պահանջում է անվավեր ճանաչել ավագանիների որոշումները՝ Ջերմուկը, Եղեգնաձոր համայնքները էկո-տնտեսական տարածք դարձնելու և համայնքներում մետաղական հանքարդյունաբերությունն արգելելու վերաբերյալ: 

Մարզ որևէ լուրջ ներդրումային ծրագիր չբերած մարզպետը անչափ ակտիվ է մարզի՝ առանց այդ էլ սուղ բյուջեն ծախսելու հարցում: Մասնավորապես, միայն այս տարվա սկզբից  մարզպետարանաը Եղեգնաձորի սպիտակ տուն ԱԿ-ից ձեռք է բերել 444,350 դրամի տնտեսական ապրանքներ, Ա/Ձ Վարդան Պողոսյանից շուրջ 756,000 հազար դրամի ավտոմեքենաների պահպանման ծառայություններ, Մարինե Հայրապետյանից ՝ 379,000 դրամի տրանսպորտային նյութեր: 2020-ին էլ, օրինակ, 205,000 դրամի ցուցադրման համար նախատեսված պահարան էր ձեռք բերվել, ինչպես նաև՝ 605,788 դրամի գրենական պիտույք, 210,740 դրամի կենցաղային ապրանքներ:

Հետաքրքիր է նաև, թե ինչ է այս ընթացքում հայտարարագրել մարզպետ Գրիգորյանը: Վերջինիս եկամուտը ըստ հայտարարագրի բավական համեստ է՝ աշխատանքի դիմաց վարձատրությունից գոյացած 11,334,108.00 ՀՀ դրամը: Գրիգորյանի կինը, ով աշխատում է ՏՄՊՊՀ-ում հայտարարագրել է 5,317,730.00 ՀՀ դրամի աշխատավարձ: Ուշագրավ է, որ ըստ հայտարարագրի մարզպետը չունի որ անշարժ , ոչ էլ շարժական գույք: Մնում է ենթադրել, որ նա այնքան է տարված բուռն աշխատանքային գործունեությամբ, որ նույնիսկ ննջում է մարզպետարանում:

Արտահերթ խորհրդարանական ընտրությունների օրն էլ Արարատ Գրիգորյանը աչքի է ընկել օրենքի կոպիտ խախտումով՝ չլքելով ընտրատեղամասը և փաստացի ուղղորդելով հանձնաժողովի անդամներին: Նման հակաօրինական արարքի դիմաց, իհարկե, որևէ պատիժ չհետևեց, նոր Հայաստանում յուրայիններին չեն պատժում...