Հրաժարականի փոխարեն՝ արձակուրդ. ՔՊ-ական մարզպետի արարքները ներվե՞լ են

Այսօր հայտնի դարձավ, որ Շիրակի ՔՊ-ական մարզպետը, ով հրաժարվել է մանդատից և որոշել շարունակել աշխատանքային գործունեությունը մարզպետարանում, մեկնել է արձակուրդի: Ուշագրավ է, սակայն, որ Հովհաննես Հարությունյանի անվան շուրջ վերջին շրջանում արձանագրված սկանդալները այնքան շատ էին, որ ավելի տրամաբանական էր, որպեսզի վերջինս արձակուրդ մեկնելու փոխարեն՝ հրաժարական տար: Սական, սա Նոր Հայաստանն է` իր նոր և շատ դեպքերում անհասկանալի տրամաբանությամբ:

Դիցուք՝ օրեր առաջ մամուլը գրել էր, որ մարզպետը ապօրինի ազատել էր դպրոցի տնօրենի մրցույթը հաղթած դաշնակցականին: Ինչպես հասկանալի է՝ քաղաքական նկատառումները այստեղ ակնհայտ են, սակայն, մարզպետը ոչ միայն չի պատժվել, այլ մի բան էլ բավական հարմարավետ է իրեն զգում զբաղեցրած աթոռին՝ հանգիստ մեկնելով արձակուրդի:

Հուլիսի 5–ին,  Շիրակի մարզի մի քանի համայնքների բնակիչներ փակել էին Երեւան-Գյումրի մայրուղու Ազատան-Բենիամին հատվածը՝ պահանջելով կամ լուծել ոռոգման ջրի հարցը, կամ փոխհատուցում հատկացնել։ Այդ պահանջով շիրակցիները  նախորդ շաբաթ եւս բողոքի ակցիա էին իրականացրել՝ փակելով ճանապարհը: Խնդիրը իհարկե լուծում չի ստացել, բայց շիրակցիները ստիպված են սպասել՝ մինչ մարզպետը կվերադառնա վաստակած հանգստից:

Շիրակի մարզպետի ԺՊ-ի հունիսի 4-ի որոշմամբ՝ աջակցության նպատակով 49 քաղաքացու տրամադրվել է մեկ միլիոն հինգ հարյուր քառասուն հազար դրամ միանվագ օգնություն: Ինչ՞ է սա, եթե ոչ լեգալ ընտրակաշառք, որի ընտրակաշռք լինելու հանգամանքը, իհարկե, չես կարող ապացուցել, անգամ՝ ամեն բան հասկանալով և գիտակցելով: Ժողովրդավարական երկրներում նման տեղեկություններ ստանալուց հետո պատկան մարմինները առնվազն ուսումնասիրություն կանցկացնեին, սակայն, Հայաստանը ժողովրդավարության բաստիոն է միայն խոսքերի վրա, իսկ իրականում՝ ունենք այն, ինչ ունենք:

Այսքանից հետո միայն Հայաստանում պաշտոնյան հրաժարական տալու փոխարեն, կարող է գնալ հանգիստը վայելելու...