Եկամուտները և ունեցվածքը հանրությունից թաքցնող ՔՊ-ական պաշտոնյաները

Կոռուպցիայի կանխարգելման հանձնաժողովը հրապարակում է հայտարարագիր ներկայացնելու պարտականություն ունեցող այն պաշտոնատար անձանց ցուցակը, որոնք «Հանրային ծառայության մասին» օրենքով սահմանված ժամկետում չեն ներկայացրել համապատասխան հայտարարագրերը:

Սույն հղումով ներկայացված է հայտարարագրման պարտավորությունն օրենքով սահմանված ժամկետում չկատարած առաջին խումբ պաշտոնատար անձանց ցուցակը։ Գործընթացը շարունակական է լինելու, և համապատասխան տվյալների մշակմանը զուգահեռ` hանձնաժողովը փուլ առ փուլ կհրապարակի հայտարարագրման պարտավորությունն օրենքով սահմանված ժամկետում չկատարած մյուս պաշտոնատար անձանց և նրանց ընտանիքի անդամների ցուցակները։ Ուշագրավ է, որ առավել բարձր պաշտոն զբաղեցնող անձանց հանդեպ հանձնաժողովը փաստացի ավելի լոյալ է  գտնվում և չի հրապարակում վերջիններիս անունները՝ տալով ժամանակ կատարելու օրենքի պահանջը: Իսկ ինչո՞վ են գործող ՔՊ-ական բարձրաստիճան պաշտոնյաները առավել այսպես կոչված` նախկիններից, քանի որ հրապարակված ցուցակում հիմնականում համայնքապետեր են, ովքեր բնավ էլ ՔՊ-ական չեն:

Օրինակ` ՔՊ-ական պատգամավոր Կարեն Համբարձումյանը չի ներկայացրել 2020 թվականի տարեկան հայտարարագիրը:

Բացակայում է նաև պատգամավոր Հակոբ Ասլանյանի 2020 թվականի տարեկան հայտարարագիրը:

Մերի Գալստյանի 2020 թվականի տարեկան հայտարարագիրը նույնպես չկա տեղադրված պաշտոնական կայքում:

Մխիթար Հայրապետյանի 2020 թվականի տարեկան հայտարարագիրը նույնպես բացակայում է:

Վահագն Ալեքսանյանը ընդհանրապես որևէ հայտարարագիր չի ներկայացրել:

Վահե Ղալումյանը 2020 թվականի տարեկան հայտարարագիր չի ներկայացրել:

Լոռու մարզպետ Արամ Խաչատրյանի 2020 թվականի տարեկան հայտարարագիրը բացակայում է:

Արմավիրի մարզպետի տեղակալ Վահրամ Խաչատրյանը որևէ հայտարարագիր չի ներկայացրել:

Երևանի Նորք-Մարաշ վարչական շրջանի ղեկավարի տեղակալ Գագիկ Աբաջյանը չի ներկայացրել որևէ հայտարարագիր:

Երևանի Մալաթիա-ՍԵբաստիա վարչական շրջանի ղեկավարի տեղակալ Դավիթ Թումանյանը նույնպես:

ԲՏԱ նախարար Հայկ Չոբանյանի 2020 թվականի հայտարարագրերը նույնպես բացակայում են:

Արարատի մարզպետի տեղակալ Գևորգ Սիմոնյանը 2020 թվականին հայտարարագիր ընդհանրապես չի ներկայացրել:

Կոտայքի մարզպետ Ահարոն Սահակյանը ներկայացրել է միայն 2020 թվականի՝ պաշտոնեական պարտականությունները ստանձնելու հայտարարագիրը:

Ինչպես հասկանում ենք՝ պատկան մարմինները որոշել են խոշոր ձկների անունները չհրապարակել, այսպիսով վերջիններիս մյուս օրինախախտ պաշտոնյաների շարքում տալով առավել արտոնյալ պայմաններ` փրկելով հանրային պարսավանքից: Ստացվում է, որ նույն խախտումը արած նախկիններին՝ համայնքի ղեկավարներին, պատժել կարելի է, յուրայիններին՝ ոչ: