Ովքեր տապալեցին Փաշինյանի՝ 2019-ի ծրագիրը

ԱԺ-ում այսօր կառավարության ծրագրի ներկայացման օրն է: Վարչապետ Նիկոլ Փաշինյանի կողմից հերթական՝ բաժակաճառ հիշեցնող խոստումների ժողովածուն է բերվել խորհրդարան և փորձ է արվում համոզել հանրությանը, որ այդ ծրագրերը ոչ միայն իրատեսական են, այլև՝ մոտ ապագայում կյանքի կկոչվեն: Մինչդեռ կառավարության 2019 թվականի ծրագրի կատարողականը մեծաթիվ հարցեր է առաջացնում, որոնցից գլխավորը այն է, թե ինչու չեն պատժվել կառավարության ծրագրի այս կամ այն կետերը թերակատարած կամ ծրագիրը ամբողջովին տապալած պաշտոնյաները:

2019 թվականի ծրագրի մեջ կարդում ենք ՝ Կառավարության առաջնահերթությունն է Հայաստանի արտաքին և ներքին անվտանգության ապահովումը, Արցախի անվտանգության երաշխավորումը և շարունակական ամրապնդումը: Արդյո՞ք Նիկոլ Փաշինյանը կամ ՊՆ նախկին նախարար Դավիթ Տոնոյանը կարող են այսօր բացատրել, թե ինչու է Արցախը շարունակելու ամրանդվել արդեն ադրբեջանցիների տիրապետության տակ և ինչպես եղավ, որ անվտանգության երաշխավորումը ավարտվեց պատերազմով , տարածքների և մարդկային հսկայական կորուստներով և խայտառակ պարտությամբ:

Հաջորդ կետը ենթադրում էր հայության մարդկային, տնտեսական, ֆինանսական, մտավոր ներուժի՝Հայաստանի Հանրապետության զարգացման նպատակի շուրջ համախմբումը.: Հայաստան-Սփյուռք կապերը դեռ երբեք չէին եղել այսչափ թույլ և անվստահությամբ լի: Արդյո՞ք այս առումով պատասխաններ ունի մշտապես արձակուրդներում գտնվող Զարեհ Սինանյանը:

Կառավարության հաշվետվողականությունն ու թափանցիկությունը, կոռուպցիայի
հանրային մերժումը և կոռուպցիայից զերծ հանրությունը: Այն որ կոռուպցիան չի վերացել փաստում են հենց պետական մարմինների հաշվետվությունները և զեկույցները: Կոռուպցիայի կանխարգելման հանձնաժողովում էլ՝ պաշտոնյաների դեմ հարուցած վարույթների պակաս չի զգացվում:

Քաղաքականության և բիզնեսի գործնական տարանջատումը, տնտեսական
գործունեության համընդհանուր հասանելիությունը, ներդրումային միջավայրի
գրավչությունը, աշխատանքի և ներդրումների քաջալերումը: Այսօր ԱԺ-ում ՔՊ խմբակցության կազմում կան հայտնի գործարարներ, ինչը բնավ չի նպաստում բիզնեսի և քաղաքականության տարանջատմանը:

Ներդրումային միջավայրի բարելավումը, մասնավոր ներդրումների աճը: Փաշինյանի էկոնոմիկայի նախարարը դեռ երկնիշ տնտեսական աճ է խոստանում և հույս տալիս, որ այդ կայսերական պլանի չիրագործվելու դեպքում ինքը հրաժարական կներկայացնի:

Առողջապահության ոլորտի արդիականացումը և բարելավումը, որակյալ
առողջապահական ծառայությունների մատչելիության և հասանելիության ապահովումը, առողջապահական ապահովագրության համակարգի ներդրումը; Արդյո՞ք Արսեն Թորոսյանը կարող է այսօր բացատրել, թե ինչու մինչ օրս առողջապահական համակարգի ապահովագրության համակարգը կյանքի չի կոչվել և ինչու՞ է այդ կետը կրկին ներառվել կառավարության ծրագրում:

Ջրային համակարգերի կառավարման արդիականացումը և ոռոգման
համակարգերի արդիականացմանն աջակցության ծրագրերի իրականացումը; Այսօր այդ խնդիրը լուծված չէ, Ջրային կոմիտեի նախագահը հաթաթա է տալիս իրեն քննադատողներին , իսկ Նիկոլ Փաշինյանը գտել է մեղավորներին՝ ցայտաղբյուրներին:

Հայաստանից ապօրինի դուրս բերված ակտիվները վերադարձնելու նպատակով
Կառավարությունը մտադիր է վերանայել ակտիվների վերադարձի ինստիտուտի 
վերաբերյալ Հայաստանի Հանրապետության օրենսդրությունը և ամրապնդել
միջազգային համագործակցությունը:  Իսկ մինչ այդ կապիտալը Հայաստանից շարունակում է արտահոսել ահռելի տեմպերով: 

Կառավարությունը վճռական է նաև վերականգնողական արդարադատության
սկզբունքների արմատավորման հարցում. նշված սկզբունքներից բխում է, որ
արդարադատության ոլորտում իրականացվող բարեփոխումները պետք է ենթադրեն ազատազրկման ավանդական գաղափարախոսությունից անցում դեպի վերասոցիալականացման և վերականգնողական արդարադատության գաղափարախոսությանը: Ռուստամ Բադասյանը սակայն այս հարցում այնքան էլ չի հաջողել, ինչը չես ասի՝ զանգովի արդարադատության մշակույթի ձևավորման մասին:

Այսքանից հետո դժվար է հավատալ, որ կառավարությունը իսկապես պատրաստվում է կյանքի կոչել նոր ծրագրում առկա դրույթներն ու նախագծերը, այն պարզ պատճառով, որ նա թերակատարել և տապալել  է անգամ իր նախորդ ծրագիրը , որի իրագործման և իմպլեմենտացիայի համար մեկ տարի առաջ ավելի նպաստավոր պայմաններ էին առկա, քան այսօր...