ՔՊ-ական նախարարների անցած ուղին. Արշակ Կարապետյան

Շարունակելով ընթերցողների ուշադրությանը ներկայացնել՝ Նիկոլ Փաշինյանի կաբինետի անդամներին,այսօր կանդրադառնանք ՊՆ նախարար Արշակ Կարապետյանի անցած ուղուն:

Պաշտպանության նախարարության կայքում Կարապետյանի կենսագրության մասին տվյալներն աղքատիկ են: Ըստ դրանց՝ նա 1993-2018 թվականներին ծառայել է ՀՀ ԶՈՒ-ում։ 2016 թ. ապրիլյան պատերազմի ընթացքում Կարապետյանը Գլխավոր շտաբի հետախուզության վարչության պետն էր, իսկ պատերազմից հետո երրորդ նախագահ Սերժ Սարգսյանի հրամանագրով ազատվեց այդ պաշտոնից։ Հեղափոխական կառավարության օրոք Արշակ Կարապետյանը նախ դարձավ վարչապետի խորհրդական, ապա՝ Զինված ուժերի Գլխավոր շտաբի պետի տեղակալ, իսկ արդեն հուլիսի 20-ին՝ պաշտպանության նախարարի տեղակալ։ 

Հիշեցնենք, որ գեներալ-մայոր Արշակ Կարապետյանը հեռացվել էր զբաղեցրած՝ ՀՀ զինված ուժերի գլխավոր շտաբի հետախուզության վարչության պետի պաշտոնից 2016 թվականի «ապրիլյան պատերազմից» անմիջապես հետո։ Այդ նույն ժամանակահատվածում պաշտոններից զրկվեցին նաև ՊՆ նյութատեխնիկական ապահովման դեպարտամենտի պետ, նախարարի տեղակալ Ալիկ Միրզաբեկյանը, Զինված ուժերի կապի զորքերի պետ Կոմիտաս Մուրադյանը և մի շարք այլ զինվորականներ:

Թեև այդ ժամանակ աղմկահարույց պաշտոնանկությունների վերաբերյալ պաշտոնական մեկնաբանություններ չտրվեցին, այնուամենայնիվ ներքաղաքական, զինվորական կուլիսներում մեղադրանքներ էին հնչում նրանց հասցեին։ Օրինակ, Արշակ Կարապետյանի մասին ասվում էր, որ նրա ղեկավարած կառույցը ժամանակին չի տեղեկացրել Արցախում ադրբեջանական ԶՈՒ-ի հարձակման մասին։ Այդ աղմկահարույց պաշտոնանկություններից հետո, Կարապետյանը որոշ ժամանակով Մոսկվայում հանգրվանեց, այնուհետև մոտ 2 տարի անց Ռուսաստանում Հայաստանի դեսպանատանը կից ռազմական կցորդի պաշտոնում նշանակվեց։ ՀՀ ռազմաքաղաքական ղեկավարությունն այդպես էլ չպարզաբանեց ոչ պաշտոնանկությունները, ոչ էլ հետագայում Կարապետյանի այդ նշանակումը, որն, ըստ կուլիսային խոսակցությունների՝ ռուսական կողմի պահանջով էր տեղի ունեցել։