Ռուբեն Հայրապետյանը կհրաժարվի՞ մանդատից

Ռուբեն Հայրապետյանի պատգամավորական լիազորությունները դեռեւս դադարեցված չեն:

Ազգային ժողովի քարտուղարության պետ Թաթուլ Սողոմոնյանը «Ազատություն» ռադիոկայանին ասել է, որ մինչեւ սեպտեմբերի 28-ը հանրապետական պատգամավորը մանդատից հրաժարվելու մասին իր դիմումը ետ վերցնելու ժամանակ ունի:

Հայրապետյանի հրաժարականի մասին դիմումը խորհրդարանում ընթերցվեց սեպտեմբերին 5-ին, եւ Ազգային ժողովի կանոնակարգի 13-րդ հոդվածի համաձայն' պատգամավորը կարող է դիմումը ետ վերցնել խորհրդարանի նիստում դրա հրապարակումից 15 օրվա ընթացքում:

Մամուլը, անդրադառնալով այս թեմային, գրել էր, թե այդ ժամկետը լրացել է սեպտեմբերի 20-ին: Մինչդեռ Ազգային ժողովի քարտուղարության պետը պարզաբանեց, որ Ազգային ժողովի կանոնակարգի 35-րդ հոդվածի 5-րդ կետի համաձայն, 15-օրյա ժամկետի հաշվարկից պետք է հանվեն ոչ աշխատանքային' տվյալ դեպքում տոնական, հիշատակի եւ հանգստյան օրերը: Այդ սկզբունքով հաշվարկելու դեպքում' հաշվի առնելով Խաչվերաց տոնին հաջորդած մեռելոցը, նաեւ հանգստյան օրերը եւ Անկախության տոնը, ստացվում է, որ Ռուբեն Հայրապետյանը դեռեւս պատգամավոր է:

«Ազատություն» ռադիոկայանը նաև հիշեցնում է, որ հանրապետական պատգամավոր, Հայաստանի ֆուտբոլի ֆեդերացիայի նախագահ Ռուբեն Հայրապետյանը հուլիսին հայտարարեց, որ հրաժարվում է իր մանդատից' այն բանից հետո, երբ իրեն պատկանող «Հարսնաքար» ռեստորանային համալիրում դաժան ծեծի արդյունքում մահացավ երիտասարդ զինվորական բժիշկ Վահե Ավետյանը:

Մանդատից հրաժարվելու մասին դիմումը խորհրդարանում հրապարակվելուց հետո, մամուլն ակտիվ քննարկում էր' արդյոք Հայրապետյանը ետ կվերցնի՞ այն, թե՞' ոչ: Քննարկումներն ավելի թեժացան, երբ հայաստանյան մամուլը տպագրեց Les Nouvelles d’Armenie պարբերականի հարցազրույցը Հայրապետյանի հետ, որտեղ նա ասել էր, թե մանդատից հրաժարվելու դիմումը ետ վերցնելու մտադրություն ունի։