ԱՄՆ-ի հետ բանակցություններում ՌԴ-ն հայտարարել է, որ Մոսկվան մտադիր չէ «հարձակվել» Ուկրաինայի վրա

ԱՄՆ-ը շատ լուրջ է վերաբերվել Անվտանգության երաշխիքների վերաբերյալ Ռուսաստանի առաջարկներին, եւ իրականացրել է դրանց խորը ուսումնասիրություն։ Այս մասին լրագրողներին հայտարարել է ՌԴ փոխարտգործնախարար Սերգեյ Ռյաբկովը՝ անվտանգության երաշխիքների վերաբերյալ ռուս-ամերիկյան խորհրդակցությունների արդյունքներով, փոխանցում է ՏԱՍՍ-ը։

Ռյաբկովի խոսքով՝ անվտանգության երաշխիքների վերաբերյալ ԱՄՆ-ի հետ զրույցը եղել է բարդ եւ պրոֆեսիոնալ՝ առանց սուր անկյունները շրջանցելու փորձի։ «Զրույցը բարդ էր, երկար, շատ պրոֆեսիոնալ, խորը եւ կոնկրետ։ Առանց չափազանցման եւ սուր անկյունները շրջանցելու փորձերի»,- ասել է նա։

Նա հայտարարել է, որ Ռուսաստանի Դաշնությունը Ժնեւում ԱՄՆ-ին բացատրել է, թե ինչու է ՆԱՏՕ-ն չընդլայնելու մեջ հրամայական տեսնում։ «Մենք, մեր հերթին, ամերիկացիներին մանրամասն ներկայացրեցինք մեր առաջարկների տրամաբանությունն ու բովանդակային մասը, բացատրեցինք, թե ինչու է ՆԱՏՕ-ի չընդլայնման իրավական երաշխիքներ ստանալը բացարձակ հրամայական, ինչու է մեզ համար պարտադիր անհրաժեշտ ռուսական սահմանների վրա հարվածային զենքեր չտեղակայելու իրավական երաշխիքներ ստանալ, եւ ինչու ենք մենք հարց բարձրացնում, որ ՆԱՏՕ-ն, մեծ հաշվով, պետք է հրաժարվի ՆԱՏՕ-ի մեջ ընդգրկված պետությունների տարածքների նյութական յուրացումից 1997 թվականից հետո, այսինքն. Ռուսաստան-ՆԱՏՕ հիմնարար ակտի ստորագրումից հետո ընկած ժամանակահատվածի համար»,- ասել է փոխնախարարը։

Ռյաբկովը նաեւ ասել է, որ Ռուսաստանի Դաշնությունը ԱՄՆ-ի հետ բանակցություններում հայտարարել է, որ Մոսկվան Ուկրաինայի վրա «հարձակվելու» մտադրություններ չունի։ «Մենք բացատրեցինք մեր գործընկերներին, որ Ուկրաինայի վրա «հարձակվելու» պլաններ, մտադրություններ չունենք եւ չենք էլ կարող ունենալ, եւ զորքերի ու ուժերի մարտական պատրաստության բոլոր միջոցառումներն իրականացվում են մեր ազգային տարածքում <...> Չկա պատճառ վախենալու այս առումով էսկալացիայի ցանկացած սցենարից»,- ասել է նա։

Ռյաբկովը նշել է, որ բանակցությունները սկսվել են նախորդ գիշեր եւ շարունակվել երկուշաբթի օրը ողջ աշխատանքային օրվա ընթացքում։

«Մենք կողմ ենք երկխոսության շարունակմանը, մենք կողմ ենք, որ այս աշխատանքը կատարվի, որպեսզի այն չկասեցվի, որպեսզի դիվանագիտությունը շարունակի ծառայել անվտանգության ու կայունության ամրապնդման գործին։ Եւ այստեղ պայմանավորվելու հիմք կա»,- ասել է Ռյաբկովը, փոխանցում է «ՌԻԱ Նովոստին»։

Նրա խոսքով, նրանք, ովքեր ասում են, որ Ռուսաստանը կոշտ դիրքորոշում է որդեգրել անվտանգության հարցերում, ճիշտ են, բայց նրանք, ովքեր պնդում են, թե Ռուսաստանը գնացել է վերջնագրերի ուղով, բացարձակապես սխալվում են։ Նա ընդգծել է, որ Ռուսաստանն առաջարկում է պայմանավորվել եւ ցույց է տալիս, թե ինչպես է դա հնարավոր Մոսկվայի համար, բայց ոչ մեկին չի սպառնում, եթե պայմանավորվածություն չլինի։ ԱՄՆ-ի կողմից, հավելել է Ռյաբկովը, Ռուսաստանը մշտապես լսում է «այն գնի մասին, որը Ռուսաստանը ստիպված կլինի վճարել»։ «Հիմնական հարցերը առկա են, եւ մենք չենք տեսնում, որ ամերիկյան կողմը հասկանում է դրանց լուծման հրամայականը մեզ համար ընդունելի լինելու առումով»,- ասել է Ռյաբկովը։

Անվտանգության երաշխիքների վերաբերյալ ռուս-ամերիկյան խորհրդակցություններն ավարտվել են հունվարի 10-ին՝ Ժնեւում։ 2021 թվականի դեկտեմբերի 17-ին ՌԴ արտաքին գործերի նախարարությունը հրապարակել էր ԱՄՆ-ի հետ անվտանգության երաշխիքների մասին պայմանագրի նախագիծը, ինչպես նաեւ Ռուսաստանի Դաշնության եւ Հյուսիսատլանտյան դաշինքի անդամ երկրների անվտանգության միջոցառումների մասին համաձայնագրերի նախագծերը։