Փարաքարի ավագանու անդամների գործողությունները գնահատում եմ 0, որի կողքին կարելի է կապիկ նկարել. Վոլոդյա Գրիգորյան

«Ապրելու երկիր» կուսակցությունը կդիմի դատարան՝ վիճարկելու Փարաքարում հունվարի 9-ին տեղի ունեցած ավագանու նիստի իրավազորությունը: Այս մասին ԼՈՒՐԵՐ.com-ի հետ զրույցում ասաց «Ապրելու երկիր» կուսակցության համայնքապետի թեկնածու Վալոդյա Գրիգորյանը:

Նշենք, որ բավականին թեժ պայքարից հետո Փարաքարում համայնքի ղեկավար ընտրվեց «Ապրելու երկիր» կուսակցության ղեկավար Դավիթ Մինասյանը, որը առաջիկա 5 տարվա կառավարումը կիսելու է ՔՊ-ի թեկնածու Լյուդվիգ Գյուլնազարյանի հետ։ 

Մեր այն դիտարկմանը, թե անարդար չի վարվել արդյոք իրեն քվեարկածների հանդեպ և արդյոք այդ քայլով չի կորցրել նրանց վստահությունը, Վոլոդյա Գրիգորյանը հավաստիացրեց, որ վերջին դեպքերից հետո, անգամ, իրենց չքվեարկածներն են սկսել վստահել. «Ինձ ընտրողներին ես անձամբ եմ ճանաչում չընտրողներին՝ ևս, կարող եմ պնդել, որ ընտրողները իրենց տեղում են, չընտրողների մի մեծ զանգված էլ է միացել մեզ և դարձել ենք մի մեծ բանակ. մեզ մոտ նոր պայքարի սկիզբ է սկսվելու, թո՛ղ բոլորը իմանան»,- նշեց Վոլոդյա Գրիգորյանը՝ ընդգծելով, որ եթե իրենց մանդատները վայր են դրել, դա դեռ չի նշանակում, որ պայքարից դուրս են եկել:

Մանդատները վայր դնելը Վոլոդյա Գրիգորյանը այսպես մեկնաբանեց՝ «Վերջ և սկիզբ»:

Մեր այն հարցին, թե այդքան համառ պայքար մղելուց հետո վճռորոշ պահին ինչու մանդատները վայր դրեցին, նա պատասխանեց, որ այդ քայլին գնացել է կրքերը էլ ավելի չթեժացնելու նպատակով. «Չկա աշխարհում գեթ մեկը, որի ներկայությունը կամ խոսքը կարող է ինձ կաշկանդել կամ որոշմանս վրա ազդել: Ես համակիրներիս, ընկերներիս խնդրեցի, որ իրենց զուսպ պահեն և դադարեցնեն բոլոր տեսակի բողոքի ակցիաները, քանի որ նրանց անօրեն քայլերը շարունակվելու էին և վեճը արդեն կշարունակվեր դրսում, որի հետևանքները այնքան էլ լավը չէին լինի: Ինձ համար համերաշխությունը ամենակարևորն է, դրա համար, որոշեցի մանդատս դնել, այդ անարդար մարդկանց հետ ես ճանապարհ չունեմ անցնելու»,- նշեց նա:

Վերջինս մեզ հայտնեց, որ  իրենց ավագանու անդամներից մեկին նիստը սկսելուց առաջ գիշերը ժամը 00:00-ին ոստիկանությունը բերման է ենթարկել բաժին, և մինչ այսօր դեռ ազատ չի արձակվել. «Նա դեռ այստեղ է, ես ել բաժանմունքի առջև կանգնած եմ, սպասում ենք 72 ժամը լրանա՝ տեսնենք՝ ինչ է լինում: Բերման ենթարկելու հիմքը ասում են՝ խուլիգանությունն է, բայց պատկերացում չունենք՝ ինչի մասին է խոսքը»,- նշեց մեր զրուցակիցը:

Իսկ վերջում, նա ցանկացավ իր գնահատականը տալ ավագանու վերջին նիստին. «Այդ օրվա իրենց բոլոր գործողությունները գնահատել եմ 0 և + կապիկություն, կապիկ կարելի է նկարել 0-ի կողքին»,- եզրափակեց Վոլոդյա Գրիգորյանը:

Հիշեցնենք, որ ավելի վաղ, Փարաքարի ավագանու երեկ խմբակցությունները՝ «Ապրելու երկիրը», ՔՊ-ն և «Դավիթ Մինասյան» դաշինքը հայտարարեցին, որ առաջիկա հինգ տարիների ընթացքում Փարաքարում համատեղ կառավարում կիրականցնեն, սակայն, խմբակցություններն այդպես էլ համաձայնության չեկան, իսկ համատեղ կառավարում կիրականացնեն «Դավիթ Մինասյան» դաշինքը և ՔՊ-ն:

Հավելենք նաև որ ՏԻՄ ընտրությունների արդյունքում Փարաքար համայնքում «Ապրելու երկիր» կուսակցությունը 21 հոգանոց ավագանիում ստացել էր 10 մանդատ եւ 10 ձայնով իրենց թեկնածուն՝ Վոլոդյա Գրիգորյանը ընտրվել էր համայնքի ղեկավար: Ավագանու մնացած 11 անդամներն էլ համայնքապետ էին ընտրել «Դավիթ Մինասյան» դաշինքի թեկնածու Դավիթ Մինասյանին։

Զվարթ Պետրոսյան